DILI, 14 Abríl 2026 (TATOLI)—Lideransa foun ne’ebé foin eleitu husi Konsellu Solidaridade Estudantil, Estudante no Juventude Timor-Leste (Dewan Solidaritas), tersa ne’e, hasoru malu ho Prezidente Repúblika José Ramos-Horta hodi aprezenta sira-nia planu estratéjiku durante mandatu 2026-2030.
Notísia Relevante: Arquimino Ramos eleitu hanesan Sekretáriu Jerál DSMPPTL ba períodu 2025-2030
“Programa sira-ne’ebé ami planeia hela atu halo entre 2026-2030, tinan haat nia laran, ida-ne’e mak ami aprezenta ba Prezidente Repúblika, ami-nia estrutura foin mak eleitu,” Prezidente Dewan Solidaritas Mahasiswa Pemuda Pelajar Timor Timur (DSMPPTT), João Sarmento, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Nia dehan, iha enkontru ne’e Prezidente Repúblika, José Ramos-Horta, fó hanoin kona-ba asuntu balun ne’ebé ligadu ho preokupasaun nasaun nian.
“Prezidente Repúblika fó nia hanoin iha asuntu balun sai hanesan preokupasaun nasionál nian. Ezemplu, ita bele dehan fiscal cliff, Estadu direitu demokrátiku iha Timor-Leste, esforsu kona-ba rekonsiliasaun, kontrusaun pás iha Timor-Leste,” nia dehan.
Nia hatutan, prezidente rekoñese papél istóriku konsellu ne’e nian iha movimentu independénsia 1998–1999 no louva sira-nia kompromisu ne’ebé kontinua ba progresu nasaun nian.
Diskusaun ne’e foka liuliu ba kestaun nasionál sira ne’ebé urjente, liuliu “fiscal cliff” no hametin Estadu Direitu demokrátiku iha Timor-Leste.
Parte rua ne’e fó énfaze ba nesesidade vitál ba rekonsiliasaun no harii pás ne’ebé sustentável, liuliu durante tranzisaun krítika ne’ebé nasaun enfrenta daudaun.
Iha sorumutu ne’e, Prezidente Ramos-Horta fahe mós ninia esperiénsia diplomátika no istórika, hodi husu ba líder foun sira atu kontinua sai partisipante ativu hodi hasoru dezafiu sosiopolítiku sira iha nasaun laran.
Hodi espresa apoiu tomak ba inisiativa sira iha futuru, Prezidente Ramos-Horta reafirma hikas Prezidénsia nia dedikasaun atu fó kbiit ba juventude nu’udar kba’as ba nasaun.
Xefe Estadu promete atu kontinua kooperasaun no mantein polítika odamatan nakloke ba organizasaun estudantil sira atu asegura sira-nia lian kontribui ba polítika nasionál.
Enkontru ne’e termina ho kompromisu mútuo atu salva-guarda estabilidade no valór demokrátiku Timor-Leste nian liuhusi envolvimentu ativu sosiedade sivíl nian.
Jornalista : Hortencio Sanchez
Editór : Cancio Ximenes
