DILI, 22 Abríl 2026 (TATOLI) – Vise-Ministra Finansa, Regina de Jesus, klarifika katak funsionáriu públiku balun ne’ebé to’o Abríl seidauk simu saláriu, sei prosesa iha Maiu. Situasaun ida-ne’e akontese tanba instituisaun balun seidauk kompleta saláriu tuir rejime foun Dekretu-Lei númeru 3/2026.
Tuir governante, maioria instituisaun sira selu ka transfere ona saláriu ba sira-nia funsionáriu. Maibé, iha instituisaun balun mak seidauk halo pagamentu tanba seidauk ajusta saláriu tuir rejime foun.
“Instituisaun sira ne’ebé seidauk selu, bainhira ami simu ona sira-nia dadus ami prosesa [saláriu]”, Regina de Jesus hateten ba Tatoli, iha Palásiu Governu, Dili.
Nia realsa katak tuir dispozisaun iha dekretu-lei referidu, instituisaun sira iha prazu loron 30 atu halo ajustamentu saláriu. Nune’e, funsionáriu sira ne’ebé simu ona saláriu signifika sira ajusta ona saláriu tuir lei termu sertu ne’e. Enkuantu, sira ne’ebé seidauk simu, sei inklui iha prosesamentu saláriu fulan-Maiu bainhira dadus remete hotu ona.
Ministra salienta katak ho ajustamentu saláriu foun iha tinan ne’e, sei laiha tan situasaun “saláriu negativu” Novembru no Dezembru hanesan akontese iha tinan kotuk. Ida-ne’e tanba durante preprasaun orsamentu 2026, alokasaun ba saláriu no vensimentu konsidera ona dadus husi Komisaun Funsaun Públika.
“Signifika Funsaun Públika hatene ona númeru funsionáriu iha kada instituisaun atu selu iha 2026. Ho revizaun lei termu sertu foun, ita bele fiar katak saláriu sei la hetan negativu”, nia dehan.
Governu halo ajustamentu ne’e atu hadi’a diferensa ka diskrepánsia iha montante saláriu entre instituisaun sira, no asegura sistema saláriu ne’ebé justu no padronizadu.
Dadus hatudu katak to’o iha loron 07 fulan-Abríl, Funsaun Públika rejista liña ministeriál no instituisaun públika hamutuk 94 ne’ebé implementa reajustamentu. Husi totál funsionáriu hamutuk rihun 19-resin, ema 17.475 simu ona saláriu.
Notísia relevante: TATOLI, I.P no KFP diskute aplikasaun dekretu-lei foun
Jornalista: Arminda Fonseca
Editora: Maria Auxiliadora
