DILI, 27 Abríl 2026 (TATOLI)—Xefe Departamentu Imunizasaun iha Ministériu Saúde (MS), Maria Angelina Pereira, hateten komemorasaun loron semana mundiál imunizasaun ho tema “Para cada geração, as vacinas funcionam” ne’e, Ministériu Saúde husu inan-aman sira lori oan sira ba simu vasina hodi labele hetan moras.
“Husu ba inan-aman sira, ba familia sira-ne’ebé mak iha labarik foin moris to’o tinan neen (6) to’o iha tinan 11, keta haluha ba vasina. Tanba, vasinasaun ne’e importante tebes, hodi lori ita-boot sira-nia oan atu salva moris nomós bele proteje labarik sira husi moras ne’ebé mak perigu. Tanba ne’e, lori labarik sira ba fasilidade saúde ne’ebé besik simu vasina,” Maria Angelina Pereira hateten ba jornalista sira iha nia kna’ar fatin Ministériu Saúde, ohin.
Kona-ba estoke vasina, nia dehan, vasina agora daudaun iha armajen nasionál sufisiente tanba iha fulan-Abríl, MS komemora semana mundiál imunizasaun ne’ebé hahú iha loron 24 Abríl to’o 30 Abríl, signifika katak iha loron hitu de’it komemora semana mundiál imunizasaun nian.
“Dadus ne’e iha fulan-Marsu nian, ha’u atu relata katak estoke vasina rutina ne’ebé mak iha armajen nasionál ne’e, ita sufisiente. Hanesan antijen ba hepatitis B, ita-nia vasina agora sei iha hamutuk 7.780, antijen BCG hamutuk 5.900, polio hamutuk 11.640, Pentavalen hamutuk 8.120 vasina PCV hamutuk 23.280, vasina IPV hamutuk 13.350, vasina sarampu rubella hamutuk 18.550, rotavirus hamutuk 10.200, vasina HPV hamutuk 1.592, vasina DPT hamutuk 11.600, vasina TD hamutuk 2.100, vasina DT iha 5.480 no ikus vasina raiva nian ka VAR hamutuk 4.630,” nia dehan.
Nia esplika, vasina sira-ne’e sei garante to’o fulan-neen (6), tanba Ministériu Saúde servisu hamutuk ho UNICEF koopera ho INFPM halo ona kuantifikasaun no planu atu kompra.
“Vasina ne’e, ita garante kuaze to’o fulan-ne’en (6). Tanba, agora daudaun, husi parte nasionál ho servisu UNICEF koopera hamutuk ho INFPM halo ona kuantifikasaun, halo ona planu atu kompra. Ne’ebé, notifikasaun ne’e ba ona iha Denmarka ne’eba atu kompra vasina refere, atu nune’e ita labele hamosu tan estoke out iha tinan hira liuba,” nia dehan.
Nia hateten, semana mundiál imunizasaun ne’e Ministériu Saúde la la’o mesak maibé servisu hamutuk ho OMS, UNICEF, DFAT liuhusi Governu Austrália apoiu atividade lubuk ida-ne’ebé mak komemora ba iha Semana Mundiál imunizasaun ho Edukasaun promosaun saúde ko’alia Kona-ba benifisiu husi vasinasaun ne’e rasik inklui benifisiu ba vasinasaun HPV nian ba inan-aman, profesór no mós parte relijiozu sira.
“Atividade imunizasaun ne’e ba bebé foin moris to’o labarik tinan 11, da-ne’e mak ita foin dehan kompletu. Ba rutina nian, ba labarik foin moris to’o tinan ida fulan neen (6) signifika katak ne’e tenke hetan vasina sarampu rubella doze segundu ho DPT 4. Ba fali idade tama eskola hanesan tinan neen (6) ne’e, simu vasina DT depois ba fila-fali HPV ne’e ba labarik 11 to’o 14, ba labarik feto sira, ne’e ba komunidade nomós ba iha eskola,” nia hateten.
Jornalista : Felicidade Ximenes
Editór : Cancio Ximenes
