DILI, 27 Abríl 2026 (TATOLI)–Komandante Unidade Patrullamentu Fronteira (UPF), Superintendente Xefe Polísia Calisto Gonzaga, promete sei serbisu hamutuk ho komunidade Bobonaru, liliu Postu Batugade no Tentara Nasional Indonesia (TNI) inklui Polísia Repúblika Indonézia (POLRI, sigla indonéziu) atu proteje liña fronteira husi atividade ilísitu.
“Ha’u hanoin rotasaun ida instituisaun halo ne’e hanesan rotasaun ihak ámbitu instituisaun tenke ser no merese halo duni, ha’u-nia prezensa iha ida-ne’ebá la’ós atu halo buat ruma foun, ne’e kontinuasaun tanba ita-nia misaun atubele asegura fronteira hodi proteje sidadaun sira inklui fó asisténsia, defeza nomós seguransa ba soberania Estadu,” Komandante UPF, Superintendente Xefe Polísia Calisto Gonzaga, informa ba Jornalista sira iha Komandu Jerál PNTL, Kaikoli, Segunda ne’e.
Nia dehan, semana oin sei hahú halo vizita ba Postu UPF iha fronteira sira hodi haree kondisaun.
“Fasilidade balun ne’ebé mak presiza tau-matan ne’e mak ha’u informa ona ba Komandante Jerál, iha ha’u-nia primeira semana, maibé parese iha tempu badak ita sei halo vizita hahú husi Suai, Maliana to’o fali Oekusi, nune’e dadus ne’ebé mak ita aprezenta ba Komandante Jerál ne’e reál no presiza tau-atensaun,” nia akresenta.
Notísia relevante : UPF-TNI koordena serbisu hametin seguransa iha fronteira
Komandante Gonzaga haktuir, Komandante Jerál bolu ona nia iha semana kotuk hodi ko’alia kona-ba asuntu inkonsionál Postu UPF iha fronteira no Kompañia destakamentu sira UPF nian iha fronteira ne’ebé inkonsionál hodi nune’e bele fó prioridade ba oin no bele hadi’a hodi fasilita membru sira-nia serbisu.
“Ita atu empeña serbisu di’ak presiza iha kondisaun no fasilidade di’ak, inklui fatin di’ak atu nune’e ita hala’o serbisu ne’ebé di’ak,” nia katak.
Gonzaga informa liután katak, Ministériu Interiór antes konstrui ona Postu UPF hamutuk 40- resin no agora konstrui tan postu UPF lima.
“Daudaun empreza halo hela reabilitasaun no balun hahú halo ona faze mobiliáriu hatama ona kama, kulsoes atu kompleta, kuandu hotu ona ha’u aprezenta ba Komandante Jerál atu bele inaugura no ita bele uza fatin sira ne’e hodi halo serbisu,” nia katak.
Tuir Komandante UPF, atu kontrola fronteira ho di’ak presiza Postu UPF no rekursu umanu atu koloka iha postu.
“Ita-boot sira hatene ita falta rekursu, ita halo postu tenke ser iha ema para hein, tanba ne’e mak ha’u aprezenta ona asuntu ida-ne’e ba Komandante Jerál, katak ita presiza ema para aumenta kuandu ita postu foun sira ne’ebé mak iha tempu barak sei entrega,” nia katak.
Komandante UPF hato’o proposta, kolokasaun membru efetivu na’in-100-resin iha Postu Kompañia UPF no koloka iha postu foun UPF sira, maibé prefere liu hein nune’e bele reforsa serbisu seguransa iha fronteira.
“Iha postu ida koloka ema na’in hira-hira ne’e mais tékniku, maibé o que importante ita-nia ema para atu koloka,” nia tenik.
Komandante hatutan : “tuir dadus, membru efetivu UPF iha 300-resin maibé efetivu sira ne’e insufisiente tanba UPF iha kompañia haat. Pilotaun ida labele kompañia ida, imi hatene ona tenke mínimu ema 100 ita bele presta ho modelu kompañia, presta ba pelotaun ba Seksaun ne’ebé nia bele iha postu sira, ne’ebé ita presiza ema.”
Postu UPF foun lima ne’ebé Governu haruka ne’e iha Maliana, Kovalima no Oekusi.
“Ha’u hanoin tinan ne’e entrega tanba balun tama ona fasilidade mobiliáriu depois instalasaun ahi hotu konserteza ita husu autorizasaun entrega,” nia hato’o.
Jornalista : Natalino Costa
Editora : Julia Chatarina
