DILI, 28 Abríl 2026 (TATOLI) – Institutu Kualidade Timor-Leste (IQTL, sigla portugés) halo levantamentu dadus ba setór privadu sira iha munisípiu lima, ne’ebé rejista empreza hamutuk 19.
Vogál III iha Departamentu Kualifikasaun no Asuntu Internasionál IQTL, Tolentino Guterres, munisípiu lima ne’ebé IQTL halo levantamentu ne’e mak hanesan Lautein, Baukau, Likisá, Manufahi no Ermera. Empreza sira ne’e dezenvolve diferente tipu atividade, inklui produsaun bee, kafé, mina marungi, mina-nuu, ai-kulat mutin no produtu seluk tan.
Tuir responsavel, objetivu husi levantamentu mak monitoriza no kontrola produtu setór privadu sira, verifika katak sira ne’ebé eziste ne’e hetan ona Sertifikadu Análize (CoA, sigla inglés) no Sertifikadu Distribuisaun Produtu (SDP). Karik laiha, IQTL fasilita prosesu sertifikasaun, permite nune’e empreza sira kompete iha merkadu nasionál no internasionál.
Husi empreza 19 ne’e rejista, balun hetan ona Sertifikadu Distribuisaun Produtu no CoA, enkuantu balun seidauk hetan rua ne’e hotu. Tanba ne’e, IQTL mós fahe informasaun sira kona-ba prosedimentu rejistu iha nia edifísiu IQTL, hodi fasilita asesu ba sertifikadu sira ne’e.
Tolentino Guterres destaka katak atu hetan sertifikadu rua ne’e imporetante, liuliu depoizde adezaun Timor-Leste ba ASEAN, ne’ebé hanesan rekizitu ida atu garante kualidade produtu. SDP funsiona hanesan baze legál ba komersializasaun iha merkadu lokál no nasionál, enkuantu CoA asegura kualidade nesesária ba esportasaun.
Daudaun IQTL kontinua fasilita prosesu sertifikasa, maski seidauk iha laboratóriu. Entantu, instituisaun dezenvolve hela esforsu atu harii laboratóriu, ne’ebé permite, iha future, realizasaun teste iha rai-laran.
Relasiona ho munisípiu sira seluk ne’ebé seidauk halo levantamentu, IQTL kontinua halo levantamentu no monitorizasaun, ho objetivu apoia setór privadu sira bele hetan sertifikadu rua ne’e.
Entre empreza rejistada mak Fergo Unipessoal Lda., Hendrik DS Santos Enin, Ake Alberth Unipessoal Lda., no seluk tan.
Notisía relevante: IQTL halo levantamentu dadus ba setór privadu sira iha munisípiu lima
Jornalista: Arminda Fonseca
Editora: Maria Auxiliadora
