DILI, 28 Abríl 2026 (TATOLI)—Universidade Nasionál Timor Lorosa’e (UNTL) liuhusi Departamentu Edukasaun Fízika no Desportu, asina nota entendimentu ho Federasaun Sepaktakraw Timor-Leste (FSTL) atu reforsa kooperasaun no promove modalidade Sepaktakraw iha eskola sira iha territóriu.
Vise-Diretór Departamentu Edukasaun Fízika no Desportu UNTL, Francisco Brabosa Pereira, afirma kooperasaun ne’ebé parte rua asina eintermu tékniku no implementa ona.
“Ohin ita realiza nota entendimentu espesífiku ho Federasaun Sepaktakraw Timor-Leste, oinsá ita atu promove modalidade Sepaktakraw, tanba modalidade ida-ne’ebé fasil atu ita dezenvolve. Maibé iha jogu ofisiál ita presiza kampu ne’ebé mak di’ak, eintermu prosesu aprendizajen fasil atu dezenvolve,” nia dehan ba jornalista sira, iha Fundasaun Oriente, Tersa ne’e.
Nia esplika akordu ne’ebé parte rua estabelese atu asegura formasaun bázika no oinsá eleva profisionalizmu atleta sira-nia iha eskola sira.
“Ami fasilita ona formasaun ba eskola sira, etapa dahuluk ami realiza iha eskola Ensinu Báziku Sentrál no Ensinu Sekundáriu Jerál 10 Dezembru Komoro. Ida-ne’e, oinsá lori modalidade ne’e ba eskola sira atu ita-nia estudante sira partika di’ak liután,” nia dehan.
Francisco informa kooperasaun ne’e hanesan parte ida atu prenxe rekizitu Ajénsia Nasionál Avaliasaun Akreditasaun no Akadémika (ANAAA) nian katak departamentu tenke halo kooperasaun ho nivel nasionál no internasionál.
“Ba nivel nasionál mak ita asina akordu ho Federasaun Sepaktakraw Timor-Leste no nivel internasionál mak ita asina akordu ho Universidade Públika Jogjakarta,” Francisco hateten.
Iha fatin hanesan, Prezidente Federasaun Sepaktakraw Timor-Leste, José Caetano Guterres, dehan akordu ne’e federasaun ho fakuldade desportu ho inisiativa atu promove di’ak liután Sepaktakraw, liuliu atividade formasaun ba atleta no treinadór sira.
“Ita la’o kle’ur ona ne’ebé mak envolve UNTL liuliu Departamentu Desportu no estudante barak mak pratika iha atleta Sepaktakraw nian. Entaun, bá-oin ita hakarak promove Sepaktakraw, tanba ita hatene UNTL nia papél importante la’ós de’it forma estudante ho siénsia maibé pratika mós importante,” nia esplika.
Nia hateten estudante ne’ebé hili Departamentu Desportu la sala, tanba Timor-Leste presiza estudante barak, nune’e ba futuru sai atleta no profesór desportu.
“Ita haree iha eskola ensinu sekundáriu jerál no esinu báziku profesór sira falta. Tanba ne’e mak Governu tenke eleva Departamentu Desportu UNTL husi diploma ba lisensiatura. Tanba Federasaun ho esperansa ida katak ba futuru sei koordena di’ak liután ho nasaun sira iha ASEAN hodi haruka formadór sira mai fasilita formasaun ba estudante sira,” nia espera.
Jornalista: Osória Marques
Editór: Xisto Freitas da Piedade
