DILI, 30 Abríl 2026 (TATOLI) – Prezidente Kámara Komérsiu no Indústria Timor-Leste (CCI-TL), Jorge Serrano, afirma katak lideransa Timor-Leste ba Prezidénsia ASEAN, iha 2029, reprezenta oportunidade ba setór privadu sira esplora produtu iha merkadu internasionál.
Tuir nia esplika, Estadu deklara ona atu Timor-Leste asume prezidénsia ASEAN nian no, automatikamente, Kámara Komérsiu mós sei lidera ASEAN Business Advisory Council (ASEAN BAC).
“Ita tenke prepara an la’ós de’it ba serimónia, maibé ita mós prepara ita-nia produtu sira para iha ne’ebá ita aproveita iha ita-nia mandatu ne’e esplora atu tau iha merkadu”, Jorge Serrano dehan ba Tatoli, iha Akait, Dili.
Nia realsa katak aleinde preparasaun serimoniál, CCI-TL hamutuk ho emprezáriu sira reflete kona-ba investimentu iha área oioin. Ezemplu, refere inisiativa iha Likisá, ne’ebé emprezáriu balun investe iha kriasaun manu, produsaun manu-tolun, no atividade seluk tan.
“Sasán sira-ne’e la’o, maibé ita mós tenke la’o tuir ritmu ne’ebé ita-nia rai ne’e iha. Hanoin Governu ho setór privadu presiza la’o hamutuk para depois ita bele atinje objetivu sira ne’ebé ita iha”, nia afirma.
Serrano subliña katak setór privadu foka iha preparasaun produtu, tanba hatene katak ASEAN ne’e merkadu ne’ebé boot. Rekoñese katak Timor-Leste labele kompete produtu sira ho membru ASEAN sira seluk, más konsidera país iha vantajen iha oferta produtu orgániku no saudavel, ne’ebé dalaruma iha nivel globál buka hahán hanesan ne’e. Produtu sira ne’ebé identifika mak foos orgániku, animál lokál no seluk tan.
“Ha’u labele ko’alia hothotu tanba iha filozofia negósiu, segredu ne’e mak klamar negósiu nian”, salienta.
Tuir nia, emprezáriu sira daudaun prepara alternativa enerjétika, hanesan produsaun biokombustivel husi matéria-prima iha rai-laran, hanesan inisiativa inovadora balun, ne’ebé setór privadu hakarak kontribui.
Dirijente ne’e destaka katak setór privadu daudaun halo hela esforsu ba preparasaun no kompete iha merkadu ASEAN to’o 2029.
Jornalista: Arminda Fonseca
Editora: Maria Auxiliadora
