DILI, 30 Abríl 2026 (TATOLI)—Timor-Leste Police Development Programme (TLPDP) nu’udar parseiru husi Polísia Nasionál Timor-Leste (PNTL), Kinta ne’e, kapasita membru Polísia na’in-15 ba formasaun lian ingléz.
Komandante Komandu Pesoa Formasaun, Komisáriu Asistente Polísia José Soares, hateten, Komandu PNTL serbisu hamutuk ho TLPDP durante tinan naruk ona hodi kapasita membru iha área oioin hanesan jestaun, investigasaun, no infraestrutura.
“Agora foka liu ba kursu ingléz, tanba Timor-Leste pertense ba membru ASEAN, no PNTL sei integra-an iha ASEAN Police (ASEANPOL) iha Fulan-Juñu mai, entaun ita tenke prepara rekursu, nune’e ita iha koñesimentu no abilidade iha nível rai-laran nomós rai-li’ur ho ita-nia parseiru sira,” Komisáriu Asistente Polísia hato’o ba Jornalista sira bainhira enserra formasaun iha Sentru Formasaun Polísia, Komoro.
Notísia relevante : Investe iha merenda eskolár, investe iha futuru nasaun nian
Nia konsidera, liuhusi formasaun ho koñesimentu bele transmite hanoin no hakarak ba ema seluk ho di’ak, nune’e ema bele kompreende.
“Kursu ohin ne’e nível báziku no dahuluk, nune’e ohin membru 15 mak termina,” nia akresenta.
Komandante José esplika, durante ne’e membru balun ba kursu iha SOLS maibé tanba laiha kontratu ruma ba sira, tanba ne’e sira auzénsia nune’e iha diferente boot bainhira sira kursu iha li’ur.
Tanba ne’e mak komandu komunika ho parte TLPDP hodi fó formasaun kursu lian ingléz ba membru sira husi Unidade no Departamentu sira.
“Ba oin ita sei alarga tan ba reprezentante PNTL husi munisípiu, nune’e ita konsiente katak kursu ida-ne’e ba PNTL hotu,” nia akresenta.
Komandante Komandu Pesoa Formasaun ne’e realsa, enserramentu kursu ne’e Komandu PNTL hahú ho bázika, depois kontinua iha nível sira tuir mai, nune’e membru PNTL iha kapasidade lian hodi bele ko’alia ho parseiru sira.
“Tanba tinan 2029 ita sai uma-na’in ba enkontru ASEAN, tuir mai ba ASEANPOL, ne’e komunikasaun hotu no sei laiha tradusaun. Tanba ne’e ita hotu esforsu-an hodi iha koñesimentu ba área língua,” nia katak.
Iha fatin hanesan, Reprezentante TLPDP iha Timor-Leste, Superentendente Darren Boyd-Skinner, hateten, TLPDP sei konsentra fó formasaun ba área ne’ebé mak PNTL sira estabelese nomós bazeia ba rekezitu ne’ebé mak Governu hato’o.
“Hanesan parseiru PNTL nia, ami orgullu tebes tanba ohin ne’e ita-nia PNTL sira kompleta kursu ingléz ho susesu,” nia tenik.
Darren Boyd-Skinner fundamenta, PNTL presiza hatene no apreende lian ingléz tanba ba oin sira mós sei envolve iha ASEANPOL, nune’e sira-nia movimentu ne’e sei ho lian ingléz de’it, tanba ne’e mak importante tebes atu apreende.
“Ba futuru área importante lubuk ne’ebé mak TLPDP sei implementa mak dezenvolvimentu ka kapasitasaun ita-nia PNTL. Nune’e mós área seluk ne’ebé ita sei kordena nune’e sira bele serbisu di’ak hamutuk ho komunidade,” nia tenik.
Jornalista : Natalino Costa
Editora : Julia Chatarina
