OPINIAUN

Investe iha merenda eskolár, investe iha futuru nasaun nian

Investe iha merenda eskolár, investe iha futuru nasaun nian

Dageng Liu, Reprezentante WFP iha Timor-Leste.

Hosi:

Dageng Liu, Reprezentante WFP iha Timor-Leste

Diskursu Prezidente José Ramos-Horta iha Enkontru Parseiru Dezenvolvimentu Timor-Leste (TLDPM) iha loron 10 fulan Juñu bolu antensaun atu suporta ninia vizaun  “Bebé ne’ebé foin moris, mate kedas labele eziste iha Timor-Leste no labarik sira presiza moris ho saudavel, iha nutrisaun di’ak, aprende ho di’ak no seguru”. Programa merenda eskolár nudár investimentu ne’ebé di’ak ba nasaun nia futuru liu husi fornese nutrisaun, saúde no edukasaun di’ak ba labarik sira.

Timor-Leste nudár nasaun joven, iha ne’ebé populasaun ho porsentu 39 ho idade entre 0 too 14. Kuaze 320,000 ka um tersu husi populasaun Timor-Leste atende eskola primária, tan ne’e merenda/ refeisaun eskolár hanesan dalan ida ne’ebé efetivu no boot liu atu halo impaktu ba Timor-Leste nia futuru.

Merenda eskolár kontribui ba edukasaun no moris di’ak labarik sira nian. Labarik ne’ebé hamlaha, labele dezenvolve an ho di’ak, labele mós aprende ho di’ak no iha risku bo’ot atu hasoru dezafiu saúde nian barak iha futuru. Merenda eskolár oferese fontes nutriente regular ne’ebé esensiál ba labarik sira nia dezenvolvimentu fíziku no mental. Programa merenda eskolár laos de’it iha benefísiu ba labarik sira, maibé mós hanesan inísiu di’ak ida ba transformasaun sistema ai han. Ai-han ne’ebé kuda lokálmente ne’e mak ai-han ne’ebé nutritivu, saudavel, no dalan efisiente atu fornese ba estudante sira nudár ai-han loron-loron nian no iha tempo hanesan mós bele kria mós oportunidade ba rendimentu no moris di’ak ba to’os na’in sira. Programa merenda eskolár mós nudár oportunidade di’ak atu hanorin labarik sira oinsa atu han ho di’ak no aprende konabá moris ne’ebé sustentável no pratika dieta saudavel.

Merenda eskolár hasa’e prezensa no ajuda labarik feto sira, liu-liu adulsente sira atu kontinua eskola. Ida ne’e bele sai hanesan dalan efetivu ida atu prevene labarik feto sira kaben sedu no evita sira atu ko’us (isin rua) lalais. Rezultadu rua ne’ebé bele sai hanesan ameasa ba feto sira ho kondisaun ki’ak no moras ida ne’ebé perigu, no mós konsekuénsia ba inegualdade ne’ebé ho sentidu kle’an.

Programa merenda eskolár iha Timor-Leste implementa ona hahú kedas iha tinan 2005 nudár WFP nia parte operasionál to’o entrega fila fali ba Ministério Edukasaun Juventude no Desportu iha tinan 2011. Implementasaun programa merenda eskolár nasionál momentu ida ne’e hasoru hela obstákulu oin-oin hahú husi alokasaun orsamentu to’o estrutura administrativu sira. Deskobrimentu husi relatóriu Prienxe Lakuna Nutrisaun (FNG 2020) relata katak importante tebes atu bele hasa’e osan ba merenda eskolár husi $25 centavos ba $50 centavos ba kada refeisaun atu bele hetan impaktu saudavel no nutritivu. Infelizmente, ita observa ona katak alokasaun orsamentu ba merenda eskolár tinan 7 ikus ne’e redús tiha ona ho aproximasaun husi $17 millaun iha 2015 tun ba $8,5 millaun iha tinan 2022.

Situasaun Covid 19 halo eskola sira taka no iha interrompsaun kritiku ba setór edukasaun, saúde no nutrisaun nian iha eskola sira, kauza krize bo’ot ba prosesu aprendizajen ne’ebé seidauk rezolvidu.

Estudu preliminariu konabá Ai-han no Nutrisaun iha Timor-Leste ne’ebé hala’o iha tinan 2020 hatudu katak taxa prevalensia ne’ebé as ba ema ho rais badak hamutuk 47 porsentu entre labarik sira ne’ebé ho tinan 5 mai kraik, signifika katak kada labarik daruak badak liu husi sira nia tinan loloos. Pandemia Covid-19, inundasaun iha 2021 no atuálmente presu ai-han no mina ne’ebé sae maka’as tanba konflitu iha Ukránia halo estadu nutrisaun sai at liu tan.

Iha Jullu 2021, Governu hatudu sira nia kometimentu polítika ne’ebé boot ba merenda eskolár hodi asina deklarasaun kometimentu ba Koligasaun Global Merenda Eskolár.

Maske Governu halo ona asaun halun hodi resolve obstákulu sira ne’e, sei iha nesesidade barak ne’ebe presiza kompleta – halo ho lalais. Saúde eskolár no nutrisaun tenke mantén iha ajenda dezenvolvimentu nian hodi loke oportunidade ba jerasaun potensiál aban bainrua nian. (*)

iklan
iklan

Leave a Reply

iklan
error: Content is protected !!