KOVALIMA, 02 Maiu 2026 (TATOLI) – Polísia Nasionál Timor-Leste (PNTL) Munisípiu Kovalima liuhusi Seksaun Investigasaun Kriminál rejista, entre Janeiru no Abríl 2026, kazu hamutuk 50.
Komandante PNTL Munisípiu Kovalima, Superintendente Xefe Paulino Carmo Ferreira, dehan husi totál kazu ne’e, iha Janeiru rejista 15, Fevereiru 13, Marsu 16 no Abríl neen.
“Kazu 50 ne’ebé Seksaun investigasaun kriminál rejista ne’e violénsia doméstika mak aas tanba rejista hamutuk 17, tuirmai mak kazu agresaun fizika ka asaltu hamutuk 16, kazu sira seluk hanesan danu, omesídiu ida ka rua no sira seluk ho númeru ne’ebé ki’ik”, komandante fó sai dadus ne’e iha Komandu PNTL, iha Santa Rosa, ohin.
Aleinde ne’e, PNTL Kovalima rejista kazu asidente durante fulan haat hamutuk 18. Husi númeru ne’e, rua mak nia prosesu pendente iha Ministériu Públiku (MP), 13 rezolve liuhusi família, tanba dalabarak asidente mai husi neglijénsia no ema la espera atu akontese, no kazu tolu iha prosesu investigasaun.
Tuir dadus, membru PNTL iha munisípiu Kovalima hamutuk 159. Husi númeru balun koloka ba eskuadra hitu no balun presta servisu iha Komandu PNTL.
Jornalista: Celestina Teles
Editora: Maria Auxiliadora
