VIKEKE, 04 Maiu 2026 (TATOLI)—Ministru Agrikultura, Peska, Pekuária no Floresta, Marcos da Cruz hamutuk ho Autoridade Munisípiu Vikeke, Segunda ne’e, lansa kuda hare ho mákina iha natar Uedare, Suku Luka, Postu Vikeke Vila, Munisípiu Vikeke.
Iha lansamentu kuda hare ne’e, Marcos da Cruz, haktuir ohin Ministériu Agrikultura, Peska, Pekuária no Floresta (MAPPF) mai introdús utilizasaun mákina moderna kuda hare nian ba agrikultór sira iha Suku Luka hodi fó korajen no apoia ba agrikultór sira hasa’e produsaun hare.
“Tanba ne’e, Governu servisu hamutuk ho ita-nia agrikultór sira hasa’e produsaun agrikultura, nune’e, ohin ita lansa kuda hare ho mákina moderna. Ha’u mós apresia ita-nia agrikultór sira Luka ne’ebé ho inisiativa halo natar,” Ministru Marcos ba jornalista sira iha natar Uedare, Suku Luka, Segunda ne’e.
Governante ne’e esplika utiliza ekipamentu mákina kuda hare ne’e fasilita agrikultór sira ba dezenvolvimentu setór agrikulltura, tanba uluk uza ema hodi kuda hare agrikultór sira tenke selu iha-ne’ebé kada ema $5, maibé ohin loron utiliza mákina ne’e bele redús gastu selu ema.
Iha fatin hanesan, Prezidente Autoridade Munisípiu Vikeke, Francisco C. S. de Gonzaga Soares, hato’o agradesimentu ba MAPPF ne’ebé apoia agrikultór sira iha Munisípiu Vikeke liuhusi utilizasaun ekipamentu modernu kuda hare tanba ajuda hakma’an agrikultór sira-nia servisu iha natar.
Iha parte seluk, Koordenadór natar Uedare, Cosme Gomes Guterres, hateten utilizasaun ekipamentu kuda hare tulun ona agrikultór sira, tanba uluk agrikultór sira tenke selu ema mak foin kuda hare.
Tuir dadus, natar iha Uedare totál hamutuk ektare 135. Natar ne’ebé daudaun ne’e funsiona hamutuk ektare 37, ektare 90 seidauk funsiona tanba irrigasaun aat. Natar Uedare sei benefísia uma-kain 52.
Entretantu, partisipa iha serimónia lansamentu kuda hare ho mákina ne’e kompostu husi autoridade lokál, veteranu, diretór munisipál, komadante PNTL Munisípiu Vikeke, tékniku MAPPF nasionál.
Jornalista: Vitorino Lopes da Costa
Editóra: Xisto Freitas da Piedade
