VIKEKE, 08 Maiu 2026 (TATOLI)—Xefe Aldeia Buka Dalan, Suku Matahoi, Postu Uatulari, Munisípiu Vikeke, Vicente Rui Soares, informa agrikultór aldeia tolu husi Suku Matahoi inklui Suku Makadike de Baixo daudaun ne’e enfrenta difikuldade ba hand tractor atu halai natar, tan ne’e natar kuaze ektare 20-resin seidauk halai.
“Natar 20-resin mak agrikultór sira labele halai tanba menus hand tractor, agrikultór sira aluga de’it ema-nia tratór rua, ne’ebé labele halai hotu natar sira-ne’e,” Vicente Rui Soares ba TATOLI iha natar Betór, Sesta ne’e.
Vicente haktuir hand tractor ne’ebé daudaun ne’e halai natar Betór ne’e agrikultór sira selu tuir natar nia ektare, iha-ne’ebé kada ektare agrikultór sira selu $200 no balu selu ho hare bainhira tempu kolleta.
“Ita hakarak hasa’e produsaun agríkola, maibé fasilidade la adekuadu, difikulta ba meta hasa’e produsaun. Tan ne’e, ami husu parte relevante sira ajuda haree agrikultór sira-nia preokupasaun,” nia tenik.
Tuir dadus, komunidade husi Aldeia Buka Dalan, Aldeia Uanama no Aldeia Gomiuru husi Suku Makadike de Baixo ho totál uma-kain 21 no totál abitante na’in-82 sai benefísiu ba natar Betór.
Jornalista: Vitorino Lopes da Costa
Editór: Xisto Freitas da Piedade
