OEKUSI, 08 Maiu 2026 (TATOLI) – Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), sesta-feira ohin, identifika ona motorizada ne’ebé lakon iha sub-rejiaun Pássabe no motorizada daudaun ne’e asegura ona iha kuartel PNTL Oekusi ho autór inisiál OE hodi hein prosesu investigasaun. Jornalista Ajénsia Tatoli,I.P, tenta konfirma asuntu ho komandante PNTL Oekusi, Superentendente Xefe Polísia, Nicolau Francelino da Costa, maibé laiha fatin, tanba daudaun ne’e hala’o serbisu iha komandu PNTL Nasionál.
Notísia relevante:Atensaun! ‘Liman-naruk’ hahú ona iha Oekusi, PNTL rejista kazu primeiru motorizada lakon
Domingos Poto, nu’udar na’in ba motorizada, rekomenda ba Komandu PNTL atu loke prosesu ba autór tuir lei, nune’e iha futuru labele akontese tan iha rejiaun Oekusi. “Ha’u rekomenda ba parte PNTL, ha’u hakarak loke prosesu ba autór, atu labele akontese tan iha Oekusi, tanba uluk kedas nunka lakon. Agora hetan ona, ami agradese ba PNTL tanba hetan ona ha’u-nia motorizada,” nia hateten iha nia rezidénsia bairru Masin, sesta ohin.
Entretantu, kronólojia akontesimentu motorizada lakon iha loron Sábadu madrugada 02 Maiu 2026 kuaze tuku 03:00 dadersan, motorizada ho koor metan tipu Revo Fit karboratór ho xapa matrikula, OE.4160 ne’ebé para hela iha uma oin, iha bairru Masin aldeia Sanane suku Costa sub-rejiaun Pante Makasar.
Jornalista: Abílio Elo Nini
Editór: Rafael Ximenes de A. Belo
