BOBONARU, 12 Maiu 2026 (TATOLI)-Sentru Solidariedade Sosiál no Inkluzaun (CSSI, sigla portugés) Delegasaun Territoriál Munisípiu Bobonaru fó ona apoiau ponuál ba eis-dadur na’in-11 hodi utiliza orsamentu natoon ne’e atu halo atividade negósiu hodi hadi’ak sira-nia moris.
Diretór CCSI Bobonaru, Acácio Gonçalves, dehan eis-dadur hirak ne’ebé hetan apoiu ne’e mai husi postu administrativu Atabae, Balibó, Kailaku no Maliana.
Notísia relevante: Eis dadur Marito Baptista loke karpintária fó servisu ba joven sira
“Ita apoia maluk sira ne’ebé tama prizaun depois sira kumpre ona sentensa, sira fila mai klaru buat hotu laiha. Entaun, ita fó apoiu orsamentu natoon para bele halo netik buat ruma hodi sustenta sira-nia moris”, Acácio dehan.
Nia subliña katak CCSI Bobonaru mós fó ona apoiu negósiu sustentavel ba Ema ho Defisiénsia na’in-lima no tinan ne’e Governu liuhusi Ministériu Solidariedade Sosiál (MSSI) aprova dadus atu fó tan tulun ba defisiensia na’in-20.
“Ita mós fó apoia ba ema ho defisiensia ne’ebé loke sira-nia kioske, entaun ita fó apoia orsamentu la barak $800 mai kraik hodi aumenta tan sira-nia negosiu ne’e ba futuru”, nia dehan.
Ho apoia hirak ne’e, Acácio haktuir katak ekipa sira halo monitorizasaun iha terrenu no avalia katak benifisiáriu sira utiliza duni orsamentu ne’e hodi halo atividade negósiu no seluk tan.
“Entaun ami motiva sira nafatin dehan atu maneja didi’ak osan ne’e tanba apoia ne’e la’ós atu fó filafali, jere ba para la’o mesak, tanba ita la’ós apoia ida-ne’e depois aban-bainrua mós apoia nafatin”, nia dehan.
Aleinde ne’e, programa seluk ne’ebé CSSI realiza ona mak halo reajustamentu ba dadus Bolsa da Mãe kKondisionál no tempu badak sei halo pagamentu ba benifisiáriu hamutuk 300. CSSI mós halo ona levantamentu dadus iha terrenu atu fó apoia ba idozu abandonadu sira.
“Dalaruma sira-nia oan ba serbisu iha li’ur, husik hela sira mesak. Entaun, presiza Estadu liuhusi MSSI mai iha CSSI atu fó asisténsia umanitária hodi sustenta sira-nia moris, nune’e ita labele husik hela sira hanesan vuneravél liu”, Acácio realsa.
CCSI Bobonaru mós sei ekmiña ba MSSI dadus Ema ho Defisiensia hamutuk 436 hodi hetan apoiu.
Notísia relevante: ADTL-MSSI diskute lei espesífiku proteje direitu Ema ho Defisiénsia sira
Jornalista: Sergio da Cruz
Editora: Maria Auxiliadora
