BOBONARU, 18 Maiu 2026 (TATOLI) – Xefe Suku Lour, Miguel Lopes Gomes, hateten instalasaun liña internét Starlink lori vantajen ba suku hirak ne’ebé iha área remota, liuliu Lour hodi apoia serbisu atualizasaun dadus ba Sistema Integradu Informasaun Jestaun Suku no Aldeia (SIIGSA).
Nia esplika katak durante ne’e autoridade lokál enfrenta difikuldade atu atualiza dadus ba nivel munisípiu no nasionál tanba internét ne’ebé limita no maioria sei uza sistema manuál, maibé ho instalasaun internét iha suku sei ajuda tebes.
“Ho Starlink ne’e ami sente ajuda tebes, tanba agora sistema SIIGSA bele manda dadus ba munisípiu no nasionál ho lalais no fásil liu”, Miguel Lopes dehan ba Tatoli, segunda-feira ne’e
Notísia relevante: Manetelu klarifika instalasaun antena Starlink iha suku 450 ne’e la’ós desizaun polítika
Autoridade ne’e mós halo komparasaun kona-ba liña internét ne’ebé durante ne’e uza, ba nia Starlink nia velosidade aas liu no fó asesu internét ne’ebé di’ak tebes ba servisu administrativu no komunikasaun.
Nia konsidera katak instalasaun internét iha suku importante tebetebes atu apoia servisu governasaun no fasilita prosesu administrasaun iha nivel lokál.
Antes Starlink, Miguel haktuir katak autoridade suku tenke uza osan rasik atu sosa pulsa internét hodi manda dadus liuhusi sistema SIIGSA. “Agora ami la presiza gasta osan tanba Governu mak kontratu no selu kompañia. Ami hein uza de’it. Ida-ne’e hanesan mudansa signifikativa ida hafoin ita ukun-an tinan 24”, nia realsa.
Iha sorin seluk, Xefe suku Ritabou, Maximiano dos Santos Araújo, reforsa katak prezensa Starlink ne’e ajuda tebes serbisu funsionariu suku.
“Durante fulan ida ona ita-nia funsionáriu sira servisu la hanesan uluk ita ketik-ketik, más ho liña ida-ne’e sira bele serbisu ho di’ak liután, prepara dadus ba programa SIIGSA nian, velosidade kapa’as. Tuir ha’u-nia observasaun fasilita funsioáariu serbisu lais”, nia dehan
Tuir nia, ho asesu internét ne’ebé di’ak liu, serbisu administrativu no komunikasaun entre suku, munisípiu no Governu sentrál bele la’o ho efisiente no fó atendimentu di’ak liu ba komunidade.
Antena Starlink ne’e instala ona iha sede suku 50 iha munisípiu Bobonaru.
Notisía relevante: DNIK klarifika instala antena Starlink ne’e provizóriu la’ós permanente
Jornalista: Sergio da Cruz
Editora: Maria Auxiliadora
