OEKUSI, 19 Maiu 2026 (TATOLI) – Diretór Serbisu Rejionál Obra Públika, Rejiaun Administrativa Espesiál Oekusi Ambenu (RAEOA), Remígio Nuno Sila, informa, kompañia Kefi-Oel Unipesoál Lda, hahú ona konstrusaun monumentu Masakre Tumin, ne’ebé lokaliza iha suku Bobometo sub-rejiaun Oésilo ho kategória projetu planu mestre (master-plant).
“Ita kontinua ezekuta konstrusaun Masakre Tumin, ho kategória konstrusaun foun tinan -2026 nian, tanba Serbisu Rejionál Obra Públika Oekusi, prepara ona nia dezeñu master-plant, signifika projetu ne’e pluri-anuál, kada tinan aloka orsamentu atu finaliza konstrusaun ne’e, nu’udar fatin istória no valór ba Estadu ba matebian sira-ne’ebé mate iha tinan-1999, tanba ne’e, autoridade tenke tau importánsia hodi implementa,” nia hateten ba jornalista sira iha Oekusi, ohin.
Notísia relevante:Futuru edifísiu Masakre Tumin sei konstrui ho verba rihun $139-resin
Tuir nia, daudaun ne’e kompañia hahú ona obra referida, no tuir planu tenke finaliza iha tinan ne’e, bazeia nia durasaun tempu ne’ebé determina ona, tanba faze dahuluk konstrui uluk kapela no jardím.
“Projetu ne’e dezeña iha 2025 ho kategória master-plant, signifika nia item serbisu, ne’ebé tenki tau iha masakre ne’e, maka kapela, sei hadi’a mós jardin sai hanesan fatin destinu ba futuru, tenke sai fatin dignu nu’udar turizmu, nune’e bele hetan vizitante tantu rai-laran no rai-li’ur, hodi kontribui reseita ba kofre Estadu,” nia hateten.
Notísia relevante:Ponte alternativa konstrui iha semitériu Masakre Tumin konkluídu
Xefe Suku Bobometo, José Labi Caet, orgullu, autoridade tenke hadi’a monumentu masakre Tumin nu’udar valorizasaun ba matebian sira-ne’ebé mate iha tinan-1999.
“Kompañia Kefi-Oel, hahú hala’o ona serbisu iha Masakre ne’e tanba asina ona kontratu ho Autoridade, maibé foin daudaun autoridade sira foin simu pose, entaun seidauk halo lansamentu primeiru pedra, maibé sira (kompañia) hamoos ona ho aterru, espera katak autoridade bele hatuur ona fatuk dahuluk, nune’e bele kontinua serbisu,” nia orgullu.
Notísia relevante:Autoridade RAEOA prevee rihun $100-resin reabilita monumentu Masakre Tumin
Entretantu, konstrusaun ne’e, implementa husi kompañia Kefi-Oel Unipesoál Lda ho valór kontra rihun $130-resin, Autoridade aloka husi Orsamentu Jerál Estadu (OJE) 2026 nian liuhusi Fundu Espesiál Dezenvolvimentu (FED) RAEOA nian ho durasaun serbisu fulan-neen.
Jornalista: Abílio Elo Nini
Editór: Rafael Ximenes de A. Belo
