DILI, 26 Maiu 2026 (TATOLI)—Primeiru-Ministru, Kay Rala Xanana Gusmão, rekomenda ba Prezidente Autoridade Munisípiu (PAM) sira hotu atu envolve produtu Bafo Kay Rala iha menu merenda eskolár
Notísia Relevante: SEKoop hakarak promove Bafo Kay Rala inklui iha programa Merenda Eskolár
“Imi hatene Bafo Kay Rala ne’e ka lae. Karik, produtu ne’e mak iha imi-nia munisípiu sira iha karik, favór ida tau ba iha menu merenda eskolár nian,” Primeiru-Ministru, Kay Rala Xanana Gusmão hateten iha diskursu abertura ba atividade Konsellu Koordenasaun Territoriál iha JL World, áreia branka, ohin.
Atoridade munisíipál sira tenke aproxima ho kooperativa sira-ne’ebé prodús hela produtu Bafo Kay Rala ne’e, atu tau tan ba menu merenda eskolár tanba Bafo ne’e hahán ida-ne’ebé di’ak tebes.
Ministru Administrasaun Estatál (MAE), Tomas do Rosário Cabral, hateten rekomendasaun husi PM ne’e atu fó hatene ba munisípiu sira katak munisípiu balun ne’ebé iha produtu Bafo Kay Rala ne’e autoridade sira presiza haree hodi tau ba menu merenda eskolár.
“Tanba menu indikativu ba merenda eskolár ne’e iha 75% mak uza produtu lokál,” Ministru Tomas Cabral hateten.
Iha biban ne’e, Prezidente Autoridade Munisípiu Lautein, Melio de Jesus, hateten merenda eskolár ne’ebé iha Lautein agora responsabiliza husi gurpu komunitária no sira envolve produtu Bafo Kay Rala iha menu merenda eskolár.
“Ita foin implementa iha tinan kotuk, no Bafo Kay Rala ne’e distirbui husi MOKATIL. Ita koordena mós ho kooperativa, tanba Bafo Kay Rala ne’e multifunsaun bele prodús ho modelu oioin,” nia dehan.
Nia hatutan, Lautein iha produtu Bafo Kay Rala maibé ladun barak tanba ne’e sira husu ba SECoop atu hasa’e nafatin produsaun ne’e, atu menu iha merenda eskolár labele lakon tanba iha eskola balun mak uza tein ba merenda eskolár no balun lae tamba produsaun laiha.
Notísia Relevante: SEKoop atribui sertifikadu ba formandu prosesamentu Bafo Kay Rala sai ai-han
Jornalista : Alexandra da Costa
Editór : Cancio Ximenes
