BAUKAU, 02 Juñu 2026 (TATOLI)–Ekipa Eletrisidade Timor-Leste (EDTL, E.P) iha semana-oin, fulan-ne’e, hahú instala riin elétrika no halo ligasaun ba uma-kain hamutuk 205 iha Suku Lavateri, Postu Administrativu Baguia.
Xefe Suku Lavateri, Domingos da Costa Pereira, relata ekipa EDTL, E.P. husi nasionál finaliza ona levantamentu dadus no atuál koloka ona materiál hanesan riin iha fatin referidu.
Líder komunitáriu ne’e aprezenta, tuir dadus, totál uma-kain hamutuk 205, maibé uma-kain 83 asesu ona liña elétrika no 122 seidauk asesu.
Nia akresenta katak mezmu uma-kain 83 asesu ona ba liña eletrisidade tanba insiativa privada hanesan sosa rasik fiu enkuantu riin uza au, ho nune’e presiza halo instalasaun riin foun ne’ebé seguru no labele hetan ameasa bainhira akontese dezastre naturál.
“Tinan-ne’e sei rezolve tanba atuál ai-riin iha ona lokál projetu no semana-oin hahú ona. Maioria komunidade aldeia lima seidauk hotu, tanba hela besik malu,” Xefe Suku Lavateri informa ba TATOLI iha Vila Nova, Segunda ne’e.
Entretantu, Suku Lavateri hamutuk aldeia lima kompostu husi Fanalolo, Ledana, Onortibalari, Osso Isi-Lari no Uabubo ho totál populasaun hamutuk 2.189 kompostu mane 1.079 no feto 1.110 husi uma-kain 522.
Jornalista: Natalino Belo
Editór: Xisto Freitas da Piedade
