DILI, 08 Juñu 2026 (TATOLI) – Fisheries Liaison Officer ka Ofisiál Ligasaun ho Peska husi Empreza ENI, Galiano Waidau, haktuir, durante halo serbisu peskiza iha tasi kona-ba sízmiku nian dezde Abríl to’o horseik (07/06) konsege hetan ró 100-resin husi Indonézia halo peska ilegál iha Tasi Timór kosta súl área Vikeke.
Nia esplika, kona-ba atividade sízmiku ninian sira viajen ba kosta súl hahú iha loron 04 Abríl no to’o iha ne’ebá hahú serbisu atividade sízmiku iha loron 06 Abríl to’o agora nafatin hetan atividade ró ilegál.
“Ró ne’ebé halo atividade ilegál iha ita-nia tasi ne’e kada loron aumenta, horisehik ami hetan tan ró ida husi Indonézia ne’ebé kaer ikan foku ba tuna nian, mai foti ikan área ne’ebé ami halo atividade sízmiku nian”, Galiano Waidau ba Tatoli via telefonika, segunda ne’e.
Nia dehan, ró ne’ebé horisehik sira hetan foti ikan ne’e daudaun para hela iha tasi klaran hela tanba Timor-Leste seidauk iha ekipamentu ne’ebé fasilita seguransa sira ba kaer.
Nia subliña, ró ne’ebé tama sai iha kosta súl ne’e semana 10, ida-ne’e konta ró sira ne’ebé sira hetan ne’e, maibé balu husi dook husi halai de’it ne’e konta la hotu.
Lembra katak iha loron, 17 Abríl 2026 Ministériu Agrikultura, Pekuária, Peska no Floresta (MAPPF), lihuhusi Diresaun-Jerál Inspesaun no Monitorizasaun Sistema, relata katak hahú husi tinan-2024 to’o Abríl 2026 rejista ona ró peska ilegál hamutuk 38 unidade halo atividade kaer ikan iha tasi Timór.
Husi ró 38 ne’e, Timor-Leste lakon ikan tonelada hamutuk 2.280 konverte ba osan karik lakon $48.586.000.
Notisia relevante: AMN rejista ró 50 halo peska ilegál iha Tasi Timor durante fulan-lima ikus
Jornalista: Arminda Fonseca
Editór: Evaristo Soares Martins
