DILI, 08 Juñu 2026 (TATOLI)–Polísia Nasionál Timor-Leste (PNTL) Munisípiu Dili, daudaun ne’e buka tuir hela suspeitu sira ne’ebé suspeitadu hadau sidadaun feto na’in-rua nia telemóvel, ne’ebé rezulta sidaun feto ida ho naran Nadine Batista Ribeiro do Carmo ho idade 15 lakon vida iha Loja 24 oras área Praia dos Coqueiros, iha Domingu (07/06) purvolta tuku 20:00.
Kazu ne’e akontese bainhira sidaun feto na’in-rua kondús motorizada, derrepente suspeitu sira mós ho motorizada halai tuir sira, nune’e konsege foti sidadaun feto na’in-rua nia melemóvel ne’ebé tau iha motór oin.
Ho akontesimentu ne’e, vítima na’in-rua duni tuir to’o iha área Madre Alma, iha Loja 24 nia oin, vítima na’in-rua soke motór monu, nune’e rezulta vítima Nandine monu hodi nia ulun baku ba aspal no hakotu iis kedan iha fatin akontesimentu. Iha parte seluk entidade balun evakua kedan sidadaun feto ne’ebé nu’udar motorista bá ospitál nasionál hodi halo tratamentu intensivu.
Notísia relevante : PNTL sei buka tuir lider grupu ”naokten”
Nune’e, Polísia buka tuir suspeitu nia paradeiru ba kazu hadau telemóvel iha estrada.
Segundu Komandante PNTL Munisípiu Dili, Superintendente Polísia Luís da Silva, haktuir, hodikalan suspeitu sira konsege hadau telemóvel, entaun vítima sira duni tuir to’o iha ne’ebá no sira hetan asidente.
“Entaun ida tuur iha kotuk ne’e monu no mate iha fatin. Hodikalan kedas ita lori kedas mate-isin ba mortuáriu no agora ita tenta para entrega mate-isin bá família, autór sira ne’ebé mak envolve iha laran ne’e ita sei buka tuir nafatin hodi halo kapturasaun depois submete ba Ministériu Públiku,” Komandante Luís da Silva informa ba Jornalista sira iha Eskola Finantil, Segunda ne’e.
Nia dehan, Polísia sei ba rekolla evidénsia sira hanesan CCTV sira ne’ebé ema monta iha fatin akontesimentu.
“Nune’e ita bele buka tuir autór sira ho lalais no justu. Suspeitu seidauk identifika tanba ho kondisaun kalan boot, maibé sei apoiu husi CCTV ne’ebé monta iha fatin akontesimentu sira-ne’e ita sei nafatin buka tuir,” nia akresenta.
Komandante hatutan, kazu hanesan ne’e akontese dalabarak ona no envolve ema menór idade.
“Autór sira to’o iha Tribunál liberta tanba ho idade ne’ebé kiik, nune’e Governu liuhusi PNTL nafatin serbisu hamutuk ho Ministériu Edukasaun hodi sensibiliza informasaun ba estudante sira ne’ebé ho menór idade hodi hasees-an husi kazu naok sira-ne’e,” nia relata.
Kondisaun ne’e tanba tuir lei, ema sira ho idade menór labele tama prosesu legál.
Jornalista : Natalino Costa
Editora : Julia Chatarina
