HEADLINE, SEGURANSA

PNTL sei buka tuir lider grupu ”naokten”

PNTL sei buka tuir lider grupu ”naokten”

komandante Sup Xefi munisipiu Dili, Orlando Gomes. Imajen/TATOLI

DILI, 28 maiu 2024 (TATOLI) – Komandante Polísia Nasionál Timor-Leste (PNTL), Munisípiu Dili, Superintendente Xefe Polísia, Orlando Gomes, hateten PNTL sei buka tuir lider grupu sira ne’ebé hadau ema nia sasan no foti subar iha Dili.

”Atu hateten katak kazu naok telemovél ho naok sasan sira seluk, Komandu Munisípiu Dili lansa servisu sekretu sira hodi kontinua nafatin fornese informasaun mai komandu no ita bo’ot sira hatene katak polísia ka’er ona ema balun no sei kontinua buka tuir autór sira seluk ne’ebé envolve kazu ne’e”, Superintendente Xefe Polísia, Orlando Gomes, hateten ba jornalista sira iha Komandu PNTL Dili Caicoli, tersa ne’e.

Nia dehan, krime sira hanesan ne’e nudar krime organizadu tanba ne’e PNTL sei la tolera no sei lansa servisu sekretu kuandu akontese kazu sira hanesan, atu polísia bele prevensaun.

“Kazu sira ne’e ita konsidera hanesan grupu organizadu, la’os ema ida no rua de’it, sira ne’e ho grupu kedan ne’ebé maka sempre halo asaltu ba vítima sira ne’ebé motór iha tempu loron no kalan, ne’ebé ita konsidera sira ne’e grupu organizadu. Maibé ita-nia informasaun sekreta sira ne’e hatene muito bem sira ne’e. Kuandu sira naok iha fatin sira iha kapitál Dili ita-nia servisu sekretu hatene kedan sira-nia diresaun ne’ebé sira hela ba. Naokten iha Dili laran ne’e ita koñese muito bem, tanba ita tinan hirak liu ba ne’e ita ka’er bebeik”, nia relembra.

Orlando hateten, grupu naokten sira ne’e, iha balun membru tuan no balun mak membru foun.

“Tanba ne’e, ita hatene sira, ne’ebé kuandu akontese kazu furtu ka roubo iha Dili laran ne’e ita sempre hatene, se mak envolve no ita identifika grupu sira ne’e lalais, tanba ita hatene muito bem naokten sira iha Dili laran”, nia dehan.

Hatan kona-ba polísia detein suspeitu sira ne’e to’o iha Tribunál liberta, Komandante Munisípiu Dili ne’e hateten, PNTL iha kompeténsia tuir lei, halo identifikasaun no detein suspeitu sira no asegura evidénsia sira depois submete auto notísia ba Ministériu Públiku.

“Ministériu Públiku mak nain ba asaun penal, sira mak halo prosesu penal, PNTL ne’e halo de’it nia servisu, halo identifikasaun no ba ka’er de’it suspeitu sira. Tribunál mak liberta, ami labele koalia kompeténsia Tribunál, tanba ne’e desizaun orgaun seluk nian, ami komandu nian kompeténsia ne’e atu esforsu nafatin servisu hamutuk ho ita-nia informasaun sekreta sira ho ita komunidade sira atu kontinua nafatin halo prevensaun ba ema sira ne’ebé gosta naok sasan sira ne’e”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!