VIKEKE, 23 Juñu 2026 (TATOLI)—Prezidente Autoridade Munisípiu Vikeke, Francisco C. S. de G. Soares, sente triste lakon figura Vikeke-oan ida, Antigu Prezidente Repúblika (PR), Francisco Guterres “Lú Olo”, ne’ebé fila ona ba Aman Maromak nia kadunan santu.
“Nu’udár Autoridade Munisípiu Vikeke sente lakon nia ema figura boot hanesan Vikeke-oan ida-ne’ebé mak fó nia vida tomak ba libertasaun pátria. Saudozu sai hanesan mós aman ida ba inspiradór ba Vikeke oan lubun ida. Tan ne’e, ha’u lori autoridade no povu Vikeke hakarak hato’o sentida kondelensia profunda ba família maktoba Antigu PR Francisco Guterres ‘Lú Olo’ ne’ebé fila ona ba Na’i Maromak nia kadunan santu. Ita hotu lakon no triste ho situasaun ida-ne’e,” Francisco C. S. de G. Soares ba TATOLI iha nia knaar fatin, Tersa ne’e.
Autoridade Munisípiu Vikeke hato’o korajen ba família husi Saudozu Lú Olo hodi simu planu Maromak nian.
Notísia relevante: Emosaun tristeza marka xegada kadáver eis-Prezidente Repúblika Lú Olo iha aeroportu Dili
“Ita-nia saudozu bá ona mundu seluk, maibé nia husik buat barak ba ita-ne’ebé sai hanesan legadu ida ba jerasaun sira. Ami espera katak família sira tenke forte nafatin no ba Vikeke-oan sira tenke forte nafatin agradese ba ita-nia saudozu, tanba ita-nia aman hamorin ona ita-nia naran Vikeke ba nasionál no mundu internasionál,” nia hato’o.
Kona-ba lutu nasionál, Francisco dehan, horisehik (22/06) Governu Dekreta lutu nasionál durante loron hitu ne’ebé autoridade orienta ona edifísiu hotu-hotu tantu instiusaun Governu no sosiedade sira iha Vikeke hasa’e bandeira meiu-haste hodi fó sentidu katak hola-parte iha lutu nasionál.
Entretantu, liuhusi sorumutus, Xefe Gabinete Autoridade Munisípiu Vikeke, Luís António da S. Soares, dirije minutu ida selénsiu ba Antigu PR, Francisco Guterres ‘Lú Olo’ ne’ebé termina nia peregrinasaun iha mundu.
“Iha momentu tristeza ida-ne’e mai ita hamutuk hodi fó minutu ida selénsiu ba ita-nia eroi rezisténsia ne’ebé husik ona ita,” nia harohan.
Tuir observasaun jornalista TATOLI iha Munisípiu Vikeke nota katak iha dadeer ne’e kuaze edifísiu sira hasa’e bandeira nasionál ho meia-haste, komunidade hakmatek, laiha barullu maski joven sira asiste kopa mundiál.
Jornalista: Vitorino Lopes da Costa
Editór: Xisto Freitas da Piedade
