DILI, 23 Juñu 2026 (TATOLI)—Estudante sira nivel eskolaridade eseptu ensinu pre-eskolár, iha área Komoro nian simu xegada kadáver Antigu Prezidente Repúblika, Francisco Guterres Lú Olo, ho halerik.
Elizabet Belo nu’udár estudante Ensinu Báziku 10 Dezembru Komoro hateten nia (saudozu) nia luta ba libertasaun rai no povu ida-ne’e inklui ninia kontribui ba dezenvolvimentu termina ona iha 21 Juñu 2026 iha Ospitál Prince Court, Kuala Lumpur, Malázia.
“Nia luta ba Timor-Leste to’o ukun rasik-an no kontinua dedika nia matenek, pasiénsia, fuan domin na’in ba ami povu no nasaun ne’e nian, ramata ona iha 21 Juñu. Nune’e, ohin ami estudante 10 Dezembru simu xegada ne’e ho tanis no hakarak fó ami-nia omenajen ikus ba nia dedikasaun,” nia dehan ba TATOLI iha Komoro, Tersa ne’e.
Ho matabeen Elizabet dehan lakon no semo aas tebes Saudozu Lú Olo hosi mundu bá mundu seluk, espera nia espíritu hamutuk ho santu sira iha laleha fó naroman ba rai no povu ida-ne’e.
Nune’e mós, Mónica Sarmento sente triste no la espera aman laran di’ak ne’e bele husik sedu mundu ida-ne’e.
“Sente triste tanba avó Lú Olo ne’e matenek no sempre hadomi ema, la halo an no la foti an ba nia povu,” nia esplika.
Entretantu, estudante Pasquela de Jesus reforsa tan katak nia simu informasaun hosi eskola hodi forma simu kadáver Saudozu Lú Olo hodi fó onra ba nia dedikasaun.
“Ami hein ita-nia eroi, aman boot nasaun nian,” nia dehan.
Tuir observasaun TATOLI hosi Aeroportu Internasionál Prezidente Nicolau Lobato Komoro, komunidade, estudante, forsa, madre, traballadór loja sira, negosiante merkadu sira inklui profesór sira forma ho liña rua hosi estrada sorin loos no karuk, to’o iha rezidénsia Faról hodi simu kadáver Saudozu Lú Olo ho matabeen.
Hafoin kadáver Saudozu Lú Olo sai hosi Aeroportu Internasionál Prezidente Nicolau Lobato, komunidade kari aifuan no halo orasaun. Bainhira to’o iha nia rezidénsia iha tuku 08:19 família boot hosi Ossú no nia militante, simpatizante, veteranu, veterana, membru Asembleia Konstituente, membru Parlamentu Nasionál, membru Governu, relijiozu, sosiedade sivíl, simu ho tanis.
Bainhira hatún kadáver saudozu nian iha nia rezidénsia, espoza laiha forsa no oin halai, família ko’us tama ba nia fatin, oan sira hakuak família hodi tanis.
Jornalista: Osória Marques
Editór: Xisto Freitas da Piedade
