DILI, 24 Juñu 2026 (TATOLI) – Juventude Rezisténsia Timor-Leste presta omenajen ba antigu Prezidente Repúblika, Francisco Gutteres “Lú Olo”, no destaka katak sente lakon figura di’ak ba jerasaun foun no nasaun ne’e.
Reprezentante Juventude Rezisténsia, José Nuno Lopes “Sabarai”, hateten bainhira rona novidade eis-Prezidente Repúblika hakotu iis sente triste tanba lakon aman no eroi nasionál ida.
“Ita sente lakon tanba ita haree memória luta ida-ne’ebé husik hela ba nasaun, povu no jerasaun foun sira. Ita agradese barak ba maktoban Lú Olo tanba nia husik hela buat barak ba ita, liuliu haraik-an, umildade, pasiénsia, ida-ne’e atu ita banati tuir”, José Nuno hateten iha Faról, ohin.
Nia dehan papél importante ne’ebé maktoban halo hahú iha tinan 24 ba kotuk no kontinua depoizde independénsia fó ninia kontribuisaun ba rai ida-ne’e hanesan Prezidente Asembleia Konstituiente, Prezidente Parlamentu Nasionál, no Prezidente Repúblika.
“Ita hotu haree ita-nia aman ema ida-ne’ebé umildade, pasiénsia hodi atua situasaun hothotu ne’ebé akontese iha ita-nia rai”, nia dehan.
Tuir nia, durante nia moris, liuliu bainhira sai Prezidente Repúblika nia hasoru situasaun ka problema polítika barak, maibé nia jere ninia funsaun sira iha momentu ida ne’ebé ho kalma tebes tuir Konstituisaun fó ba nia. “Tanba ne’e mak ho situsaun sira ne’e, ita haree no sente sofre ka lakon ita-nia líder di’ak ida husi nasaun ne’e”.
Nia subliña maktoban nia moris nafatin fó hanoin ba nia maluk veteranu, rezisténsia sira katak “tempu to’o ona ita hamutuk tanba demokrasia ida-ne’e mai fahe ita”.
“Entaun fenómena polítika ne’ebé iha ninia moris, polítika haree katak situasaun ita ultrapasa depois tinan 24 iha ai-laran, no tinan 24 iha vila, katak iha diferensa ne’ebé boot. Entaun, nia fanu nia maun-alin rezisténsia, liuliu veteranu sira atu hamutuk hodi transforma buat foun ida lori povu ba moris di’ak. Ida-ne’e mensajen ne’ebé ita-nia aman husik hela mai ita”, dehan.
Nia hateten mensajen ida-ne’e mós ba juventude rezisténsia sira no mensajen ida-ne’ebé tranzmite iha momentu triste ida-ne’e.
“Mensajen ida atu hateten ba ita-nia aman funu-na’in sira ne’ebe sei iha, to’o ona ho situasaun ida-ne’ebé agora akontese, no ita presiza ita-nia aman sira-nia hamutuk no konsolidasaun haree fali ba sira-nia sofrimentu pasadu tinan 24 iha ai-laran, tenke kaer prinsípiu ida-ne’e atu define meta loloos ba nasaun ne’e”, nia afirma.
Ho mensajen ida-ne’e, hanesan Juventude Rezisténsia bolu maun-alin rezisténsia no organizasaun rezisténsia tomak presiza hamutuk no konsolida malu hodi buka alternativa ida ne’ebé bele solusiona di’ak liu hodi defende valór demokrasia, prinsípiu luta ba povu ninia bein-estar.
Notísia relevante: Ai-kameli “Lú Olo” nian: Memória moris ida-ne’ebé kontinua hamorin Oekusi
Jornalista: Arminda Fonseca
Editora: Maria Auxiliadora
