VIKEKE, 24 Juñu 2026 (TATOLI)—Koordenadór Partidu FRETILIN Postu Vikeke Vila, Munisípiu Vikeke, Luís Sarmento, sente lakon líder vizionáriu Antigu Prezidente Repúbliku (PR), Francisco Guterres ‘Lú Olo’ nu’udár aman motivadór ba jerasaun foun sira.
“Ami hato’o sentida kondolénsia ba família enlutada, hanesan jerasaun foun no koordenadór partidu FRETILIN ba Postu Vikeke Vila, ita sente triste boot tanba ita lakon ona líder vizionáriu di’ak ida. Ita koñesedu atuál prezidente partidu FRETILIN, eis Prezidente Repúblika (PR), Prezidente Parlamentu, Prezidente Asembleia Konstituiente ne’ebé ita lakon ona figura di’ak,” Luís Sarmento ba TATOLI iha Postu Vikeke Vila, Kuarta ne’e.
Notísia relevante: Estudante sira simu kadáver Antigu Prezidente Lú Olo ho halerik
Nia hatutan antigu PR maihusi povu maubere nia oan, ne’ebé sai líder ida-ne’ebé ho karakter onestidade no karakter ne’ebé haraik-an, iha prosesu luta rezisténsia nian kontribui ba nasaun Timor-Leste.
“Nune’e, ha’u hanesan kuadru polítiku ba partidu nian iha baze sente lakon ona figura motivadór ida iha Timor-Leste. Ho saudozu nia karakter sira-ne’e sai inspirasaun ba jerasaun foun sira,” nia esplika.
Luís aprofunda katak durante ne’e saodozu sempre iha prontidaun, kualker tempu saudozu fó nia hanoin ba luta libertasaun nasionál.
Jornalista: Vitorino Lopes da Costa
Editór: Xisto Freitas da Piedade
