BAUKAU, 24 Juñu 2026 (TATOLI)—Serbisu Munisipál Agrikultura Baukau (SMAB) menus orsamentu hodi halo manutensaun ba tratór iha Baukau.
Xefe Mekanizasaun SMAB, Manuel da Costa Gusmão, esplika tratór sira-ne’ebé atualmente dezloka iha Baukau hamutuk 14 mak funsiona hodi apoia agrikultór sira fila-rai maibé dezafiu iha parte orsamentu ne’ebé difikulta atu aloka ba manutensaun.
“Ne’e preokupasaun mai ami, tanba atu sosa de’it buat oan mós laiha, klem oan ida atu monta iha kabudias ne’e de’it mós laiha,” Xefe Mekanizasaun hateten iha Suku Kaibada Makasae, Kuarta ne’e.
Tekniku Mekanizasaun ne’e relata kustu ba kategoria manutensaun kada trimestrál hamutuk $250 iha-ne’ebé aloka ba tratór hamutuk unidade 14 entaun kalkulasaun kada unidade $7 multiplika ba trimestrál haat iha tinan-ida, kada unidade aloka $28.
Manuel da Costa lamenta ba alokasaun orsamentu tanba la responde ba kondisaun tratór bainhira kondisaun avaria, hanesan unidade ida atuál avaria semana ida ona iha natar laran área Suku Kaibada Makasae seidauk halo manutensaun, tanba orsamentu la sufisiente.
“Tratór hirak-ne’e nia osan manutensaun trimestrál ida $250. Ami divide (fahe) ba tratór hotu-hotu, tratór ida hetan $7.00,” Manuel da Costa Gusmão akresenta.
Iha fatin seluk, Diretór Servisu Munisipál Agrikultura Baukau, Agostinho Ximenes, hateten totál tratór boot hamutuk unidade 33 maibé durante ne’e funsiona unidade 14 hodi hala’o servisu fila-rai enkuantu restu para permentente iha edifísiu tanba kondisaun aat.
“Iha munisípiu ne’e orsamentu uitoan. Kada trimestrál $250. Ne’e atu sosa de’it prafuzu no fiu ki’ik oan sira. Klaru katak labele to’o,” Agostinho hateten.
Nia rekoñese katak ho situasaun referida difikulta atu halo manutensaun ba tratór sira bainhira estragu tanba kada trimestrál alokasaun orsamentu manutesaun hamutuk $250 maibé ekipamentu iha merkadu atualmente folin karun.
Mezmu nune’e, kona-ba roda, rolamentus no seluk tan responsabilidade husi nasionál liuhusi Ministériu Agrikultura, Pekuária, Peska no Floresta (MAPPF).
Entretantu, Serbisu Munisipál Agrikultura Baukau époka tinan-ne’e apoia hodi mobiliza tratór unidade 14 fila ona rai iha natar hektare hamutuk 332 kobre ba postu administrativu tolu hanesan Vemasse, Venilale no Baucau Vila.
Jornalista: Natalino Belo
Editór: Xisto Freitas da Piedade
