VIKEKE, 25 Juñu 2026 (TATOLI)—Governu Austrália liuhusi programa Parseira Hametin Dezenvolvimentu Suku no Administrasaun Munisípiu (PARTISIPA) destaka téknika na’in-tolu (3) hodi apoia Autoridade Munisípiu Vikeke.
Iha destakamentu tékniku ne’e, Ofisiál Sénior Embaixada Austrália ba Programa PARTISIPA, José Marçal, hateten Governu Austrália destaka ofisiál na’in-tolu ne’e ho objetivu atu apoia autoridade munisípiu hodi apoiu servisu sira iha baze.
Tanba programa PARTISIPA (2021–2031) ne’ebé apoiu husi Governu Austrália, fornese asisténsia téknika ba munisípiu sira atu hadi’a infrastrutura bázika, hametin governasaun no reforsa planeamentu lokál hanesan Programa Nasionál Dezenvolvimentu Suku (PNDS) no Planu Dezenvolvimentu Integradu Munisipál (PDIM).
Atu apoiu administrasaun munisipál, ekipa téknika PARTISIPA fó asisténsia iha área xave sira hanesan governasaun lokál: Ajuda kordenasaun no jestaun munisipál. Planeamentu no orsamentu: Apoiu elaborasaun planu inkluzivu no jestaun finanseira no infraestrutura ne’ebé foka liuá kualidade projetu, implementasaun no operasaun ka manutensaun bee-moos. Asisténsia téknika ne’e destaka hodi garante servisu munisipál la’o ho di’ak no efisiente liu.
“Tanba ne’e, ohin mai ekipa mai introdús programa PARTISIPA faze daruak nian no aprezenta ofisiál ne’ebé sei apoiu autoridade munisípiu durante períodu tinan rua (2026-2028) iha área polítika governasaun lokál, planeamentu orsamentu inkluzivu no infraestrutura reziliente,” José Marçal tenik iha salaun enkontru Munisípiu Vikeke, Kinta ne’e.
Nia espera katak durante períodu tinan rua ne’e kolaborasaun di’ak husi autoridade nian, atu nune’e embaixada bele iha informasaun di’ak ba dezeñu programa sira tuirmai.
Iha fatin hanesan, Prezidente Autoridade Munisípiu Vikeke, Francisco C. S. de G. Soares, hato’o agradesimentu ba Governu Autrália ne’ebé liuhusi programa PARTISIPA apoia ofisiál tékniku mai Munisípiu Vikeke hodi tulu autoridade sira.
“Ha’u agradese ba reprezentante Embaixada Austrália ba apoiu sira através husi tékniku PARTISIPA ne’ebé durante fó apoiu másimu ba Autoridade Munisipál Vikeke koloka hahú 2023 ne’e na’in-rua agora kontinua apoia tan na’in-ida ne’ebé hamutuk na’in-tolu ona. Ami espera katak iha segunda faze nafatin ho kompromisu ida husi PARTISIPA hamutuk ita bele eleva munisípiu tama ba desentralizasaun no podér lokál,” nia akresenta.
Hafoin ramata sorumutu kolokasuan ofisiál tékniku, ekipa PARTISIPA entrega mós rezultadu avaliasaun no termu referénsia traballu ba Prezidente Autoridade Munisípiu Vikeke atubele inteira kona-bá servisu sira.
Entretantu, partisipa iha destaka ofisiál sira husi PARTISIPA ne’e kompostu husi Sekretáriu Munisipál Asuntu Administrasaun Finansa, Estevão de Carvalho no Sekretáriu Munisipál Asuntu Sosiál Organizasaun, Acácio de Sousa no Ofisiál Seniór Embaixada Austrália ba Programa PARTISIPA no ekipa husi PARTISIPA.
Jornalista: Vitorino Lopes da Costa
Editór: Xisto Freitas da Piedade
