DILI, 25 Juñu 2026 (TATOLI)—Kompañia Telekomunikasaun Telkomcel iha Timor-Leste taka nia operasaun temporariamente iha loron ohin hodi fó omenajen ikus ba Saudozu Antigu Prezidente Repúblika, Francisco Guterres “Lú Olo”, tanba sente lakon tebetebes líder istóriku no konsidera hanesan figura inspiradora povu Timor-Leste.
Jerente Telkomcel ba Servisu Kooperativu no Relasaun Públika, Joana Miranda, hateten desizaun atu taka operasaun ne’e sai husi superiór no konsellu administrasaun sira, tanba maioria funsionáriu Telkomsel iha Timor-Leste mak timoroan ne’ebé sente triste no lakon tebetebes ho partida saudozu nian.
“Ami sente lakon tebetebes líder nasaun nian, líder istóriku ne’ebé úniku, simples no besik liubá povu ki’ik sira. Tanba ne’e mak ami deside atu taka operasaun iha loron ohin hodi presta omenajen ikus ba saudozu no aban feriadu,” Joana dehan ba TATOLI iha Rezidénsia Saudozu Lú Olo, Faról, Kinta ne’e.
Tuir nia, iha loron ohin funsionáriu sira hala’o de’it servisu iha dadeer molok para totál atu partisipa iha atividade omenajen ba saudozu.
Joana hatutan Saudozu Lú Olo hanesan líder ida-ne’ebé sempre hakuak no simu ema hotu-hotu, nia lideransa simplisidade no sai inspirasaun ba jerasaun foun sira.
Nia mós relata katak durante oportunidade oioin atu hasoru malu ho saudozu iha eventu no serimónia ofisiál sira, liuliu iha Palásiu Prezidensiál, Lú Olo sempre fó mensajen ba joven sira atu kontinua estuda, aprende no buka koñesimentu foun ho atitude haraik-an.
“Nia sempre hateten katak tenke estuda, aprende no buka hatene buat ne’ebé ita seidauk hatene. Bainhira ita haraik-an, ita bele aprende husi ema seluk no prepara-an atu lori nasaun ida-ne’e ba oin,” Joana tenik.
Ba Joana no funsionáriu Telkomcel sira, mensajen no hanorin husi Saudozu Lú Olo sei nafatin moris iha sira-nia hanoin no sai patrimóniu morál ida atu orienta jerasaun foun sira iha dezenvolvimentu nasaun nian.
Saudozu Francisco Guterres “Lu-Olo”, ne’ebé uluk serbí nu’udár Prezidente Repúblika no líder istóriku FRETILIN, husik hela legadu importante ida iha luta libertasaun no konstrusaun Estadu Timor-Leste.
Jornalista: Osória Marques
Editór: Xisto Freitas da Piedade
