DILI, 30 Juñu 2026 (TATOLI)–Tribunál Judisiál Primeira Instánsia Dili (TJPID), Tersa ne’e, kontinua halo interrogatóriu judisiál dahuluk ba arguidu na’in-61 ba kazu scam call center.
Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) detein sidadaun estranjeiru na’in-61, iha loron Sesta (26/06), hafoin fraglante delitu ba atividade scam call center iha área Tibar, Postu Administrativu Bazartete, Munisípiu Likisá.
Iha atividade ne’e, Polísia preende objetu krime hanesan laptop no telemóvel ne’ebé suspeitu sira uza hodi halo atividade ilísitu.
Iha interrogatóriu dahuluk ne’e, Tribunál prosede ba alegasaun no iha faze ne’e, Ministériu Públiku (MP) liuhusi Prokuradór Matias Soares solisita ba Tribunál atu aplika medida koasaun prizaun preventiva ba arguidu ho inisiál D tanba faktu sufisiente katak arguidu envolve ba atividade scam call center.
Enkuantu, arguidu na’in-60 seluk MP aplika medida kausaun administrativa, nune’e kada arguidu iha obrigasaun selu osan ho montante $2.000 ba Tribunál no aumenta ho medida aprezentasaun períodika.
Notísia relevante : MP promeve krime haat ba arguidu na’in-61 suspeitadu scam call center iha Tibar
Iha sala interrogatóriu dahuluk ne’e, Defeza husi arguidu na’in-60 husu ba Tribunál aplika medida kausaun aprezentasaun períodika kada fulan dala-ida ba Eskudra Polísia ne’ebé besik.
Enkuantu, arguidu ho inisiál D, Defeza husu Tribunál atu aplika medida kausaun administrativa ho valór $10.000, ne’ebé hanesan Diretór ba fatin ne’ebé momentu PNTL halo apreensaun no buska.
Iha biban ne’e, Defeza husu mós ba Tribunál atu tetu pedidu husi MP, ne’ebé aplika kausaun ho osan $2.000 ba arguidu na’in-60. Karik bele Tribunál aplika kausaun menus husi $2.000.
Rona tiha alegasaun, Tribunál deside fali interrogatóriu dahuluk ne’e ba loron Kuarta (01/07) hodi rona despaisu ikus ba kazu ne’e. MP rejista kazu ne’e ho NUK :227/26.PNSIK.
Arguidu na’in 61 n’ee, husi parte MP, Prokuradór Matias Soares promove sira ho krime haat, Asosiasaun Kriminosa ne’ebé previstu iha artigu 188 husi Kódigu Penál, krime Explorasaun Ilísitu Jogu ne’ebé previstu iha artigu 322 husi Kódigu Penál, krime Brankamentus Kapitais ne’ebé previstu iha artigu 313 husi Kódigu Penál, no krime Fraude Fiskál ne’ebé previstu iha artigu 314 husi Kódigu Penál.
Arguidu sira ho inisiál hanesan DRW, AV, HAA, GA, AW, MR, NU, SF, DAM, LH, RKL, AR, UHSD, WP, GS, AS, E, MIT, SDL, RH.
Nune’e mós, MI, SEBA, ARP, VR,FS, MS, MS, IM, AS, W, SR, MSFS, MAD, A, BF, MRS, ABS, R, JR, LTM.
FR,MR, R, AS, ACY, JRD, MRP, G, MRS, UR, SS, AM, KLT, S, R, RJ, K, AS,H, no D.
Prosesu primeiru interrogatoriu ne’e prezide husi Juíza turnu Ersilia de Jesus, MP reprezenta husi Prokuradór Matias Soares, arguidu sira hetan asisténsia legal husi Advogadu Privadu n’in-rua.
Jornalista : Natalino Costa
Editora : Julia Chatarina
