DILI, 02 Jullu 2026 (TATOLI) – Meza Parlamentu Nasionál tau ona ajenda iha semana oin atu hahú diskute iha faze jeneralidade ba projetu lei sétima alterasaun Kódigu Penál kona-ba Kriminaliza Difamasaun no Injúria.
“Segunda-feira [06 Jullu], ami sei iha lei rua. Ohin, ha’u hato’o iha líder bankada”, Prezidente Parlamentu Nasionál, Maria Fernanda Lay, informa hafoin reuniaun líder bankada iha sala konferénsia Parlamentu, ohin.
Kestiona kona-ba preokupasaun husi sosiedade sivíl, entidade sira seluk no deklarasaun Prezidente Repúblika ne’ebé sei veta lei ne’e, líder másima órgaun lejizlativa ne’e hateten Komisaun A ne’ebé trata Asuntu Konstitusionál no Justisa mak integra liu ba kestaun ne’e.
“Ha’u hanesan Prezidente Parlamentu, klaru proposta to’o mai hatún ba sira halo audiénsia. Klaru karta [no] complain lubun ida, ha’u espera sai atensaun deputadu sira iha momentu debate iha espesialidade hodi hadi’a artigu iha krítika durante audiénsia no mós korrespondénsia entre órgaun balun ho Parlamentu Nasionál”, dehan.
Tanba ne’e, nia hateten atu veta ka promulga ne’e kompeténsia Prezidente Repúblika nian. “Maibé, asuntu ida ha’u hakarak hateten iha ne’e crítica não é difamar, ita-boot sira akompaña prosesu sira ne’e hotu, iha mídia sosiál mós hanesan”, nia realsa.
Maibé, tuir Fernanda Lay, krítika ema tenke iha étika no respeita direitu ema nian. “Labele ita ataka personalidade, bolu naran oioin, la merese, ne’e difama. Se tribunál seidauk hateten nia halo krime nune’e, ita bolu hanesan ne’e, ita viola direitu ema seluk nian”, katak.
Notísia relevante: Lei kriminaliza defamasaun iha hela prosesu diskusaun
Jornalista: Nelson de Sousa
Editora: Maria Auxiliadora
