DILI, 02 Juñu 2026 (TATOLI )—Governu Xina oferese millaun ¥162 (CNY) osan Xina nian, ne’ebé ekivale ba millaun US$20-resin ba implememntasaun konstrusaun Ospitál Militár.
“Investimentu boot ida husi ita-nia maluk Xina atubele fó ba timoroan sira hanesan sira-nia solidariedade ba ita,” Ministru Defeza Kontra Almirante Donaciano do Rosário da Costa Gomes ‘Pedro Klamar Fuik’ hato’o ba Jornalista sira hafoin asina termu implementasaun projetu, iha sala Ministériu Defeza, Fatuhada, Kinta ne’e.
Ministru Defeza Kontra Almirante Donaciano do Rosário da Costa Gomes ‘Pedro Klamar Fuik’ hamutuk ho Reprezentante Embaixada Xina iha Timor-Leste, Konselleiru ba Sesaun Ekonomia no Komérsiu, Suocheng Zhao, asina termu implementasaun projetu konstrusaun ospitál militár.
“Momentu ida importante tebes iha konstrusaun Ospitál Amizade Xina no Timor-Leste, foin lalais ha’u ho parte Xina nia asina termu implementasaun ba ospitál ne’ebé mak atu konstrui,” Ministru Pedro Klamar Fuik hato’o.
Notísia relevante : Ministru Defeza aprezenta projetu konstrusaun Ospitál Militár F-FDTL ba Konsellu Ministru
Nia esplika, molok to’o iha faze ne’e, liu ona prosesu naruk, nune’e to’o ohin loron iha ona faze akordu ba implementasaun projetu, signifika iha tempu besik ekipa ne’ebé dezignadu hanesan konsultór atu finaliza dezeñu ba konstrusaun Ospitál Militár.
“Sira sei fila hodi finaliza dezeñu no ita sei ba konkorda ho sira kona-ba dezeñu ne’ebé sira finaliza depois sira loke konkursu para konstrusaun, dalaruma iha tinan ne’e ou tinan oin,” nia tenik.
Iha fatin hanesan, Konselleiru ba Sesaun Ekonomia no Komérsiu, Suocheng Zhao, konsidera ohin hanesan momentu importante ba nia atu hola parte iha etapa ida-ne’e.
“Ida-ne’e garante iha investimentu ne’ebé di’ak no pasu importante tebes ba Xina atubele dezenvolve no fó solidariedade. Prosesu ne’e naruk tebes. Agora ita iha faze implementasaun, signifika katak sei iha tempu badak,” nia katak.
Ekipa ne’e atribui ona ba konsultór atu finaliza dezeñu, nune’e karik finaliza ona no sei konkorda ho dezeñu ne’e, nune’e sei iha konkursu ba konstrusaun edifísiu.
“Ita tenke implementa projetu entre Prezidente rua husi nasaun rua ne’e ho maneira ida-ne’ebé loos. Desde inísiu projetu ne’e, ami iha kooperasaun di’ak ho Ministériu Defeza Timor-Leste. Planu dezeñu, konstrusaun no seluk tan,” nia hatutan.
Reprezentante Embaixada dehhan, hafoin konfirma serbisu lubuk ida, organizasaun sei rekruta no determina unidade konstrusaun, nune’e iha nafatin prosedimentu balun iha kotuk.
“Ami sei aselera implementasaun projetu ida-ne’e lalais liután. Entaun ami-nia péritu eselente sira iha ne’e halo ona faze inisiál husi serbisu dezeñu nian. Sira sei halo planu dezeñu ne’ebé detallu liután no ami mós sei hato’o prosedimentu konstrusaun nian,” nia katak.
Jornalista : Natalino Costa
Editora : Julia Chatarina
