VIKEKE, 03 Jullu 2026 (TATOLI)—Komemora Loron Nasionál Saúde ba da-XI (22 Jullu 2015-22 Jullu 2026), Ministériu Saúde (MS) realiza atividade futeból, voliból no konsulta saúde ba komunidade iha Munisípiu Vikeke.
Iha abertura jogu futeból ne’e, Vise-Ministru ba Fortalesimentu Institusionál Saúde, José dos Reis Magno, hateten MS komemora Loron Nasionál Saúde nian ba 2026 hahú atividade desportiva reprezenta saúde kria disipliña, unidade, respeitu malu, servisu hamutuk no solidariedade.
“Ha’u hato’o agradesimentu ba Autoridade Munisípiu Vikeke ne’ebé kolabra ho di’ak relasiona ho Komemorasaun Loron Nasionál Saúde. Liuhusi komemorasaun ne’e ita fó apresiasaun ba profisionál saúde sira-ne’ebé dedika an no sakrifika loroloron halo atendimentu ba povu,” José dos Reis hateten iha kampu futeból, Postu Vikeke Vila, Sesta ne’e.
Tuir nia katak komemorasaun ida-ne’e atu haforsa kompromisu harii sistema saúde ida-ne’ebé forte, inkluzivu, asesivel no kualidade aas liután.
“Ha’u husu ba jogadór sira jogu ho disipliña hodi hametin lasu amigavel no fraternidade umana,” Vise-Ministru informa.
Tema ba komemorsaun ba tinan ida-ne’e mak: “Investe iha saúde, hanesan investe iha futuru Timor-Leste”, nune’e MS sei kontinua fortalese ospitál, sentru saúde no postu saúde sira, dezenvolve rekursu umanu, hadi’a ekipamentu, ai-moruk, haforsa programa prevensaun sira no hakbesik liután servisu saúde ba komunidade.
Jogu desportiva ba komemora Loron Nasionál Saúde organiza husi Diresaun Servisu Munisipál Saúde Vikeke, ho tasa rotativa nivel institusionál ba modalidade futeból mane no voliból feto.
Iha fatin hanesan, Prezidente Autoridade Munisípiu Vikeke, Francisco C. S de G. Soares, solisita ekipa modalidade futeból no voliból mantein disiplina no profisionalizmu, liuliu unidade iha ekipa.
Partisipa jogu futeból no voliból mai husi instuisaun sira-ne’ebé eziste iha Munisípiu Vikeke klube futeból mane hamutuk 11 no voliból feto humutuk neen (6).
Serimónia ne’e partisipa husi Sekretáriu Munisipál sira, Komandante PNTL Vikeke, autoridade lokál APA Vikeke, Xefe Gabinete ho Asesór PAM, Reprezentante Veteranu, Reverendu Padre Parókia Vikeke Vila, Diretór Servisu Munisipál ho Delegasaun Territoriál no komunidade.
Jornalista: Vitorino Lopes da Costa
Editór: Xisto Freitas da Piedade
