VIKEKE, 13 Jullu 2026 (TATOLI)—Governu liuhusi Ministériu Obra Públika hamutuk ho autoridade lokál, Sábadu (11/07), lansa obra reabilitasaun estrada rurál kilómetru haat (4)-resin husi área Kaikasabu no Haulale lokaliza iha Suku Vessoru no Babulu, Postu Uatulari, Munisípiu Vikeke.
Iha lansamentu ne’e, Diretór Servisu Obra Públika Munisípiu Vikeke, Casildo S. Gomes, haktuir estrada liga mai Suku Babulu kuaze okupasaun Indonézia to’o Timor-Leste ukun-an estrada ida-ne’e difikulta komunidade, tanba ne’e Governu liuhusi Ministériu Obra Públika tau importánsia ba estrada rurál.
“Ohin sai loron importante ba povu Uatulari, tanba ita hahú halo lansamentu estrada rurál ida-ne’e. Ha’u sente obra ne’e ramata sei ajuda povu agrikultór sira lori sira-nia produtu lokál bá merkadu, tanba durante ne’e estrada mak sai dezafiu ba ita-nia komunidade ne’ebé hela iha área rurál,” Casildo ba TATOLI iha Suku Babulu.
Nune’e, nia husu empreza implementa obra estrada tenke garante kualidade bazeia ba dezeñu, emprenza tenke servisu tuir tempu determina iha kontratu tinan ida tenke konkluidu, labele lori tinan barak mak foin remata obra.
“Ha’u husu empreza tenke servisu hamutuk ho komunidade atu sevisu reabilitasaun estrada liuliu ba rekrutamentu traballadór sira iha Suku Babulu no Vessoru hodi implementa obra la’o ho di’ak. Karik mosu problema ruma empreza bolu autoridade lokál sira hodi rezolve, atu labele mosu dezintendementu ruma”, nia sujere.
Iha fatin hanesan, Administradór Postu Uatulari, Jorge Ribeiro, hato’o agradesimentu ba Governu halo reablitasaun ba estrada rurál ne’ebé tinan barak sai difikulta movimentu komunidade ne’ebé halo movimentu ba postu no asesu bá merkadu.
“Nune’e, liuhusi reabilitasaun estrada ida-ne’e bele fasilita ami-nia komunidade Postu Uatulari. Tan ne’e, ha’u husu ba komunidade tenke kolabara empreza implementadór sira hodi servisu realitasaun ne’e labele mosu impedimentu ruma. Aleinde ne’e, ha’u husu mós ba empreza atu garante kualidade obra,” nia hato’o.
Nia esklarese obra ne’e bainhira konkluidu sei benefísia povu Uatulari tomak asesu bá merkadu no asesu bá knua tanba komunidade iha Postu Uatulari knua maioria iha foho Matebian entaun sei fasilita komunidade.
Aleinde ne’e, Diretór Empreza Kin Gamboa Unipessoal, Luís Bernando Gamboa, haktuir empreza sei garante kualidade obra no empreza sei implementa tuir tempu ne’ebé iha kontratu.
Nia dehan daudaun ne’e empreza destaka ona ekipamentu kompostu husi eskavatór, karreta fuzu no ekipamenta sira seluk iha hotu ona fatin implementasaun obra.
Reabilita estrada rurál husi Kaikasabu liga bá Haulale ho totál kilómetru 4+500, Obra nia luan metru neen (6), sei gasta orsamentu hamutuk $891.844,03, durasaun servisu tinan ida (1) nune’e sei hahú fulan Jullu sei konklui iha 23 Maiu 2027.
Tuir dadus, populasaun Suku Babulu ho totál hamutuk 2000 husi uma-kain 665.
Entretantu, iha serimónia lansamentu ne’e partisipa husi autoridade lokál, veteranu, autoridade seguransa no komunidade husi Suku Babulu no Vessoru.
Jornalista: Vitorino Lopes da Costa
Editór: Xisto Freitas da Piedade
