BAUKAU, 14 Jullu 2026 (TATOLI)—Asidente Tráfegu iha Vila Nova, Suku Tirilolo, Postu Baukau Vila, rezulta sidadaun na’in-rua hetan kanek no tohar iha parte ain.
Kazu asidente referidu akontese iha loron-Segunda (13/07/2026) purvolta tuku 15:00 Otl ne’ebé tuir kronolojia vítima na’in-rua utiliza motór marka Vixion ho xapa matríkula Q. 1434 diresaun husi Uailili atu bá Postu Laga hetan xoke husi mikrolet marka A2 ho xapa matríkula 37.629, kauza husi motorista foti vítima sira-nia dalan iha área Marabobu, Tribunál Primeira Instánsia (TPI) Vila Nova.
“Ha’u atu ba kasu-lia iha Laga maibé to’o TPI karreta foti ami-nia dalan xoke to’o hetan asidente,” Plácido Piedade Márques (42) nu’udár vítima hateten iha Ospitál Rejionál Eduardo Ximenes (HoREX- sigla portugeza) Vila Nova, Tersa ne’e.
Nia haktuir, hafoin asidente, motorista mikrolet direta ba Polísia Nasionál Timor-Leste enkuantu vítima na’in-rua dezloka kedas bá HoREX hodi hetan tratamentu tanba pankada iha ain parte loos.
Vítima husu parte autoridade seguransa rodoviária atu kontinua prosesa asidente referidu tanba konsideradu viola Kódigu Estrada hodi rezulta vítima sofre tohar.
Iha fatin hanesan, Médiku Jerál HoREX, Inocêncio Jaime Soares, hateten hafoin vítima na’in-rua hetan atendimentu, rezultadu Ray-X hatudu pasiente Plácido Piedade hetan tohar iha parte ain-loos segementu tolu, enkuantu Abílio Márques (38) tohar iha ain-loos segementu ida no kanek iha parte ulun nune’e presiza halo operasaun maibé família rejeita no deside kontinua halo tratamentu tradisionál.
“Tuir loloos halo operasaun maibé ami halo esplikasaun pasiente hamutuk ho família rejeita halo tratamentu médiku no deside uza ai-moruk tradisionál, ” nia hateten.
Entretantu, hafoin asidente tráfegu ne’e akontese, parte PNTL Baukau Seksaun Tránzitu rekolla kedas informasaun no asegura evidénsia.
Jornalista: Natalino Belo
Editór: Xisto Freitas da Piedade
