DIM 2026 bele inspira ema halo ezersisiu no adota estilu moris saudável
DILI, 08 Agostu 2026 (TATOLI)—Prezidente Repúblika, José Ramos-Horta, hateten eventu Dili Internasionál Maratona (DIM) 2026 bele sai fonte inspirasaun ba ema hotu iha Timor-Leste atu prátika ezersísiu fiziku no adopta estilo moris saudável.
Xefe estadu ne’e hateten, DIM 2026 ne’e la’ós de’it kona-ba kompetisaun entre atleta maibé mós iha objetivu atu promove saúde, desportu no bem-estar komunidade nian. Prezensa atleta no koredores husi rai oioin bele fó motivasaun ba povu timoroan atu aumenta atividade fízika iha sira-nia moris loro-loron.
“Ba ha’u konkluzaun rua ka tolu. Ida, ita halo maratona programa sira seluk ne’ebé desportu nian ne’e hanesan atu haree inspirasaun ba sosiedade tomak para buka halo ezérsisiu la’o loro-loron. Ha’u husu ba hotu-hotu tenke la’o pelemenus ba sir- ne’ebé mak idade 50 ba leten loro-loron la’o karik 30 minutu di’ak ona ba saúde,” Xefe Estadu ne’e dehan iha ambitu atividade DIM 2026 iha Palasiu Prezidensiál Nicolau Lobato, Bairru Pite, ohin.
Nia husu Joven sira bele halo desportu oiin hodi halai oras ida ka rua ne’ebé timoroan tomak buka halo desportu,” nia dehan.
Tuir Prezidente, partisipasaun iha atividade desportiva hanesan maratona bele ajuda ema atu hasa’e kondisaun fízika, dixiplina no saúde. Tanba ne’e, eventu ne’e bele sai oportunidade atu sensibiliza komunidade kona-ba importánsia ezersísiu regulár.
Dili Internasionál Maratona 2026 hala’o iha Díli ho partisipasaun atleta no koredores husi Timor-Leste no rai-liur. Eventu ne’e inklui kategoria Full Maratona 42.195Km, Half Maratona 21.1Km, 10Km Para-Athletes no 5Km Fun Run.
Prezidente Ramos-Horta mós enkoraja joven no komunidade atu haree desportu hanesan parte importante husi estilo moris saudável. Liuhosi atividade físika regulár, ema bele aumenta saúde no bem-estar, no iha tempu hanesan promove espíritu unidade no amizade entre komunidade.
Dili Internasionál Maratona 2026, nune’e la’ós de’it eventu desportivu maibé mós sai plataforma ida atu promove saúde, desportu, turizmu no amizade internasionál, enkuantu inspira povu Timor-Leste atu moris ho atividade fízika ne’ebé di’ak liután.
Jornalista : Felicidade Ximenes
Editór : Cancio Ximenes
