STAE Manatutu kontinua atende kartaun biométriku ba sidadaun 

DILI, 11 Agostu 2026 (TATOLI)–Diretór Nasionál Sekretariadu Tékniku Administrasaun Eleitorál (STAE), Mariano Natalino da Silva, hateten STAE Manatutu kontinua atende kartaun biométriku ba sidadaun sira tanba importante atualiza no hadi’a dadus eleitorál liliu dadus biométriku hodi asegura prosesu eleitorál ne’ebé organizadu no kredivel.

“Biométriku ne’e sai parte importante husi esforsu STAE atu garante dadus eleitorál sidadaun sira kompletu, loos no atualizadu. Tanba ne’e ami-nia atendimentu to’o postu administrativu sira,” nia dehan ba TATOLI via telefónika, Tersa ne’e.

Nia informa dadus eleitór to’o Fulan-Jullu Munisípiu Manatutu hamutuk 40.044 kompostu husi feto hamutuk 19.530 no mane iha 20.507.

Sidadaun atualiza ona biométriku hamutuk 19.425 kompostu husi feto iha 9.788, mane iha 9.637. Enkuantu, sidadaun ne’ebé seidauk atualiza biométriku hamutuk 18.617 kompostu husi feto hamutuk 8.794 no mane hamutuk 9.823. Totál rejistu eleitór foun hamutuk 2.002 kompostu husi feto iha 949 no mane iha 1.053.

Diretór Mariano dehan atendimentu kartaun biométriku halo iha postu administrativu sira iha terseira (3) semana fulan ida-ne’e, sei halo atendimentu permanente iha postu administrativu neen (6) to’o Fulan-Dezembru tinan ida-ne’e.

Kona-ba atendimentu ba eleitór ema ho defisiénsia no idozu sira prioriedade uluk liuhusi identifikasaun hafoin eleitór baibain.

Jornalista: Osória Marques

Editór: Xisto Freitas da Piedade