“Expo Xina-ASEAN atu hametin relasaun ekonomia iha área investimentu-komérsiu”
NANNING, 17 Setembru 2026 (TATOLI)—Timor-Leste partisipa dahuluk Expo Xina-ASEAN (CAEXPO) ba da-23 no Simeira Negósiu no Investimentu Xina-ASEAN 2026 (CABIS) iha Nanning, Xina, ne’ebé realiza iha International Convention and Exhibition Center, Guangxi, Xina, hafoin Timor-Leste sai membru ASEAN.
Notísia Relevante: CAEXPO ba da-23 marka momentu foun ho AI no Trade Matching, Timor-Leste halo estreia
Abertura ba espozisaun ne’e hala’o husi Vise-Primeiru Ministru Xina, Ding Xuexiang, hamutuk ho Sekretáriu Jeral ASEAN Kao Kim Hourn no líder sira husi nasaun ASEAN 11 inklui Timor-Leste.
Delegasaun Timor-Leste lidera direta husi Ministru Komérsiu Indústria (MKI), Nino Pereira, ne’ebé partisipa iha serimónia abertura no sei loke ofisialmente Pavillaun Timor-Leste, iha sesta (18) aban.
“Expo ne’e hanesan plataforma ne’ebé importante iha kooperasaun ekonómiku entre nasaun Xina no membru ASEAN sira. Expo Xina-ASEAN (CAEXPO) ba da-23 ne’e, atu hametin relasaun ekonomia liuliu iha área investimentu, iha komérsiu nian no atividade seluk ne’ebé liga ba turizmu nian no kultura nian mós,” Ministru Nino hateten ba TATOLI iha Naning, kuarta ne’e.
Nia dehan, Timor-Leste nia partisipasaun ida-ne’e lori benefisiu ekonómiku tanba bele demonstra Timor-Leste nia produtu.
“Ita mai partisipa atu demonstra mós ita-nia produtu balun ne’ebé durante ne’e ita rekoñese ho ita-nia kooperasaun parseria ho Xina no iha produtu balun ne’ebé ita halo ona esportasaun mai iha Xina no ita konsidera katak Xina merkadu ne’ebé potensiál ba Timor-Leste,” nia dehan.
Tuir komisaun organizadora, CAEXPO tinan ne’e halibur kompañia 3.400 resin husi nasaun no rejiaun 70, ho area espozisaun 170.000 metru kuadradu. Tema tinan ne’e mak “CAFTA 3.0 Opportunities, Better Life” ne’ebé foka ba oportunidade negósiu foun iha era ekonomia dijitál no dezenvolvimentu verde.
Iha pavillaun Timor-Leste nian, hatudu produtu prinsipal hanesan kafé organiku Timor, vanila, ai-kameli, ai-moris prosesadu no artezenatu, tais, ho objetivu atu atrai investidor Xina no loke merkadu esportasaun.
Partisipasaun ne’e mai hafoin komersiu Xina-ASEAN sa’e ba trillaun $1.05 iha 2025, no implementasaun tratadu livre komérsiu CAFTA 3.0 ne’ebé asina iha Outubru 2025.
Notísia Relevante: Jornalista internasionál 100-resin halibur iha Nanning hodi halo kobertura ba CAEXPO da-23
Jornalista : Hortêncio Sanchez
Editór : Cancio Ximenes
