MJDAK fasilita formasaun ba atleta desportiva Oekusi ba ‘Anti-doping’
OEKUSI, 18 Setembru 2026 (TATOLI) – Ministériu Juventude Desportu, Arte no Kultura (MJDAK) liuhusi Komisaun Nasionál Desportu (KND) realiza formasaun anti-doping, durante loron rua ba atleta desportiva sira iha Rejiaun Administrativa Espesiál Oekusi Ambeno (RAEOA).
Anti-doping mak konjuntu ida husi regra, polítika no atividade sira ne’ebé kriadu atu proteje desportu limpu no garante justisa no igualdade entre atleta sira. Ninia objetivu prinsipál maka atu prevene, deteta no kastigu uzu substánsia ka métodu sira ne’ebé bandu ne’ebé bele fó vantajen ne’ebé la justu, enkuantu mós salvaguarda saúde no seguransa husi pratikante sira.
Sekretáriu Ezekutivu Komisaun Nasionál Desportu, João Rodriges, esplika katak formasaun ne’e importante atu hasa’e koñesimentu ba atleta sira mai husi modalidade oioin, atu labele konsumu ai-moruk bainhira partisipa iha eventu ruma.
“Sosializasaun ne’e ba ita-nia atleta sira hotu, atu koñese labele konsumu ai-moruk saida de’it bainhira atu kompete, tanba substánsia balun dalaruma ita hemu ai-moru bele, maibé kuandu ita tama ona atleta konsumu tenki ho reseita husi dotor sira, atu ita hatene saida maka konsumu, atu halo prevensaun,” nia hateten iha salaun edukasaun Oekusi, ohin.
Nia informa katak, formasaun kompleta ho teória no prátika durante loron rua, sei ramata ho atribuisaun sertifikadu, tanba nia objetivu bainhira kompete iha eventu ruma, jogu tenke limpu ka moos.
“Katak nia treinu duni ho kapasidade, hetan akompaña hudi treinadór iha prestasaun di’ak duni, la’ós prestasaun di’ak tanba ai-moruk hodi hetan prestasaun di’ak, ida-ne’e maka objetivu husi sosializasaun ba atleta sira atu komprende atu labele konsumu ai-moruk hodi fó forsa no kbi’it balu atu kompete iha eventu sira,” nia afirma.
Notísia relevante:MJDAK fasilita formasaun Antí-Doping ba atleta Taekwondo na’in-11
Responsavel Servisu Desportu iha Oekusi, João Evaristo Bobo akresenta katak formasaun ne’e prinsipál duni ba atleta sira, bainhira kompete sira mós iha relasaun proibidu nian, atu labele konsumu.
“Tanba ne’e hanesan responsavel husi desportu Oekusi nian, ami orgullu no tenke tau matan didi’ak ba atleta sira ba modalidade saida de’it atu labele prátika tantu eventu rejionál no nasionál,” nia hateten.
Entretantu, partisipante sira iha formasaun ne’e mai husi atleta badminton, taekwondo, atletízmu, basketebal, volley ball, futeból, futeból-salaun, no seluktan.
Jornalista: Abílio Elo Nini
Editór: Rafael Ximenes de A. Belo
