TL apresia paviliaun gratuitu iha CAMEX Nanning
NANNING, 21 Setembru 2026 (TATOLI)–Ministru Komérsiu no Indústria Timor-Leste, Nino Pereira, apresia ezisténsia Paviliaun Timor-Leste iha China-ASEAN Mercantile Exchange (CAMEX) iha Nanning, Guangxi.
Ministru ne’e hala’o vizita direta ba China-ASEAN Mercantile Exchange (CAMEX) hodi haree produtu lokál Timor-Leste ne’ebé hatudu iha ne’ebá hanesan kafé no vanila.
Governante ne’e esplika katak CAMEX nu’udar plataforma ne’ebé Governu Xina ofrese ba nasaun membru ASEAN sira hodi promove sira-nia produtu iha merkadu Xina.
“Ami orgullu tanba ita-nia paviliaun mós iha CAMEX ne’e rasik, iha ne’ebá iha mós kafé, vanila maske kuantidade uitoan hela. Ne’e di’ak tebes tanba Governu Guangxi fó gratuita tinan rua ba ita hodi tau produtu no halo kontaktu negósiu direta, tanba merkadu boot mak iha Xina,” Ministru Nino hateten ba Tatoli.
Nia hatutan, CAMEX la’ós de’it fatin espozisaun maibé hanesan sentru informasaun kona-ba asesu merkadu, regulamentu no prosedimentu alfandegáriu Xina nian ba nasaun ASEAN sira.
Iha biban ne’e, Timor-Leste konvida ona Prezidente CAMEX atu vizita Timor-Leste hodi partisipa iha ASEAN Trade Forum ne’ebé sei hala’o iha Dili, hodi fahe esperiénsia no tulun mikro, pekena no média empreza sira Timor-Leste tama merkadu Xina.
Jornalista : Hortêncio Sanchez
Editór : Cancio Ximenes
