STAE simu materiál no ekipamentu ba preparasaun resensiamentu eleitorál
DÍLI, 24 Setembru 2026 (TATOLI) – Sekretariadu Tékniku Administrasaun Eleitoral (STAE) simu material no ekipamentu husi Kompañia Esmeralda no Vicemitra ba preparasaun resensiamentu eleitorál iha territóriu nasionál no diaspora.
Material no ekipamentu ne’e entrega iha edifísiu STAE, Cai-Coli, Dili, iha kuinta ne’e.
STAE iha fulan hirak liubá loke tenderizasaun ba kompanhia sira atu halo akizisaun ba materiál no ekipamentu ne’ebé sei uza iha prosesu resensiamentu eleitoráll iha territóriu nasionál no diaspora.
Husi tenderizasaun ne’e, kompañia Esmeralda no Vicemitra mak manán no ohin entrega ona materiál no ekipamentu ne’e ba STAE.
“Material no ekipamentu ne’ebé Kompañia Esmeralda no Vicemitra entrega ohin ba STAE mak hanesan blanku eleitorál hamutuk 66,200, Ribbon Printer ho marka 5000E ho unidade 2,648, Re-transfer Film Printer Fargo 5000E unidade 883, laptop unidade 34, telefone ho kamera ba atendimentu unidadae 40 no LDE Signature-Wacom hamutuk 20,” Eliviro Fernandes Moniz hateten ba TATOLI iha edifísiu STAE, Cai-Coli, Dili.
Diretór-Jerál STAE ne’e salienta katak materiál no ekipamentu sira sei fahe ba estrutura STAE iha munisípiu sira no sentru resensiamentu iha diaspora, hodi apoia prosesu resensiamentu eleitoráll.
Enkuantu, resensiamentu eleitoral ba sidadaun Timor-Leste iha diaspora, inklui Irlandia, Inglaterra, Austrália, Repúblika Korea, Portugal no nasaun sira seluk, sei hahú iha 8 Outubru 2026 no konklui iha 22 Janeiru 2027.
Resensiamentu eleitoral iha territóriu nasionál hahú ona iha fulan Agostu 2026.
Jornalista: Camilio de Sousa
Editór: Filomeno Martins
