Bidau-Akadiruhun prontu apoia implementasaun podér lokál
DILI, 20 Outubru 2026 (TATOLI) – Suku Bidau-Akadiruhun, Postu Administrativu Nain Feto, Munisípiu Dili, prontu simu implementasaun podér lokál ne’ebé planeia hahú iha 2027.
Xefe Suku Bidau-Akadiruhun, Juvinal da Conceição, hateten ba TATOLI iha Sede Suku Bidau-Akadiruhun, Dili, iha Tersa (20/10), katak suku ne’e iha rekursu umanu ho koñesimentu no kapasidade ne’ebe bele ona atu partisipa no kolabora iha prosesu implementasaun podér lokál.
“Suku Bidau-Akadiruhun prontu atu disponibiliza ema matenek sira atu partisipa iha transferénsia podér lokál ne’e, ne’ebé tuir planu sei implementa iha tinan 2027,” nia dehan.
Juvinal esplika katak, tuir dadus komunidade nian, suku ne’e iha ema ho nível edukasaun aas no espesializasaun iha área oioin, ne’ebé bele kontribui ba implementasaun programa podér lokál no apoia dezenvolvimentu suku nian.
“Tuir ami-nia dadus, iha ema ho grau doutoramentu hamutuk na’in neen, na’in 28 ho grau mestradu no na’in 123 mak ho grau lisensiatura.
Nia dehan tanba ne’e, nia suku prontu atu kolabora iha programa suku nian bainhira implementa ona podér lokál iha 2027, hodi dezenvolve Suku Bidau-Akadiruhun iha futuru.
Suku Bidau-Akadiruhun kompostu husi aldeia tolu, mak Aldeia 3 de Junho, Bédik no Nu’u Badak, ho populasaun hamutuk 3.722.
Juvinal hein katak rekursu umanu ne’ebé komunidade iha bele fó kontribuisaun pozitiva ba implementasaun podér lokál no promove dezenvolvimentu iha nível suku.
Jornalista: Camilio de Sousa
Editór: Filomeno Martins
