Evita avaria, EDTL Oekusi ho kompañia halo vejetasaun ba liña distribuisaun
OEKUSI, 26 Outubru 2026 (TATOLI) – Ekipa Eletrisidade Timor-Leste (EDTL) Rejiaun Administrativa Espesiál Oekusi Ambeno (RAEOA) hamutuk ho kompañia Bosil Unipesoál Lda, halo servisu vejetasaun limpeza ai-horis sira ba liña distribuisaun komesa husi feeder 01 to’o feeder 05 iha territóriu Oekusi hodi evita avariasaun iha tempu udan.
Xefe Departementu EDTL Oekusi, Antão Cabal, informa, servisu vejetasaun limpeza ai-horis sira, ekipa tékniku EDTL sei hamate provizória ahi elétrika iha área sira hanesan feeder 05, komesa husi Oémolo suku Lifau, Nunuheno suku Cunha, Kiusisu Oélkaem suku Taiboko perténsia sub-rejiaun Pante Makasar.
Nune’e iha sub-rejiaun Nítibe maka Netenbitimo suku Lela-Ufe, Usitaku, Lamasin suku Bene-Ufe no suku aldeia Hautefo suku Ban-Afi.
“Ohin, ita hahú fali mak área sira-ne’e sei taka, semana kotuk ita hahú ona kobre sub-rejiaun Pante Makasar, Oésilo no Pássabe,” nia hateten ba Ajénsia TATOLI,I.P iha Oekusi, ohin.
Notísia relevante:Autoridade prevee rihun $146-resin hadi’a asesórie EDTL iha territóriu RAEOA
Nia informa katak, atividade limpeza ne’e, realiza kada tinan antes tama ba tempu udan hodi halo, ne’ebé kobre sub-rejiaun hotu, hahú husi Tono suku Cunha sa’e to’o Kutete no Pássabe inklui sub-rejiaun Nítibe.
“Maibé ita fó prioridade ba feedér 04 husi suku Usitasa’e ba Pássabe, tanba ne’e ita selebra loron proklamasaun Independénsia 28 Novembru iha sub-rejiaun Pássabe, labele hetan avária,” nia hateten
Nia prosesu limpreza ne’e, kompañia mak ezekuta no hetan akompañamentu ho tékniku EDTL, tanba poste balu hetan avária, nune’e presiza tékniku atu halo levantamentu hodi prepara ba melloraentu.
Notísia relevante:EDTL Oekusi notifika ona loja Ren Zhi ne’ebé okupa ai-riin elétrika iha espasu públiku
Xefe Suku Taiboko, Matesu Naz, konsidera servisu vegetasaun ne’e importante, tanba bainhira tempu udan, labele fó ameasa komunidade sira-nia vida.
“Ha’u-nia suku mós tama hotu, nee’bé ita tenki koopera, paling ahi mate loron ida ka rua, maibé nia importante bai ta hotu nia vida, tanba kuandu taa ona tempu udan, dezatre barak sei akontese, entaun ahi ne’e mak tenke hadi’a uluk. Ha’u-nia komunidade sira, ha’u esplika ba sira katak, labele halo protesta karik ahi mate tanba parte EDTL sei hadi’a hela no halo limpeza ba ai-horis sira,” nia hateten.
Notísia relevante:EDTL instala hikas kontadór eletrisidade iha bee-matan Babulu, komunidade sei deside mekanizmu sosa pulsa
Jornalista: Abílio Elo Nini
Editór: Rafael Ximenes de A. Belo
