EDTL instala hikas kontadór eletrisidade iha bee-matan Babulu, komunidade sei deside mekanizmu sosa pulsa
VIKEKE, 26 Outubru 2026 (TATOLI)—Eletrisidade Timor-Leste, Empreza Públika (EDTL, E.P.), instala hikas kontadór eletrisidade iha bee-matan iha Suku Babulu, Postu Administrativu Uatulari, Munisípiu Vikeke. Maski instalasaun eletrisidade ne’e permite komunidade asesu fali ba bee-moos, mekanizmu atu selu eletrisidade sei presiza deside hamutuk entre autoridade lokál no komunidade.
Xefe Suku Babulu, Mário Trindade, informa katak ekipa EDTL instala hikas ona kontadór eletrisidade iha bee-matan ne’e, depoizde liña eletrisidade ne’ebé fornese enerjia ba bomba bee hetan korte iha semana hirak liubá.
“Kona-ba liña eletrisidade ba bee-matan ne’ebé antes ne’e ekipa EDTL sa’e mai hakotu, semana kotuk ne’e ekipa EDTL mai instala fali ona kontadór eletrisidade. Maibé, ita tenke sosa pulsa eletrisidade mak foin bele uza bee ba nesesidade loroloron,” Mário Trindade dehan ba TATOLI iha Suku Babulu, Segunda ne’e.
Autoridade komunitária ne’e hatutan katak, maski kontadór eletrisidade instala ona, komunidade sei presiza buka solusaun atu sosa pulsa eletrisidade hodi garante sistema bomba bee bele kontinua funsiona.
“Agora tau ona pulsa, maibé ami sei hanoin oinsá mak atu selu. Dalan ida mak halo kontribuisaun hosi kada uma-kain. Maibé, ami sei realiza enkontru ida iha suku, hafoin foin bele deside kona-ba oinsá atu sosa pulsa, atu komunidade sira bele asesu ba bee,” nia hato’o.
Iha fatin hanesan, Reprezentante Komunidade Babulu, Andre da Costa Tavares, haktuir katak komunidade no instituisaun públika sira hanesan Eskola Ensinu Báziku Filiál (EBF) Kaikasa Bu’u no Postu Saúde Kaikasa Bu’u, asesu fali ona bee-moos hafoin ekipa EDTL instala kontadór eletrisidade iha semana kotuk.
“Ekipa EDTL instala fali ona eletrisidade, nune’e ami no instituisaun sira bele asesu fali ba bee. Instalasaun bee nian di’ak hotu ona, maibé bainhira EDTL tesi liña eletrisidade ne’e, ami la konsege asesu ba bee. Agora ami iha fali ona bee. Kona-ba kontribuisaun, ami sei túr hamutuk ho autoridade lokál sira mak foin bele deside atu sosa pulsa eletrisidade,” nia akresenta.
Tuir dadus ne’ebé autoridade lokál sira oferese, sistema distribuisaun bee iha Suku Babulu benefisia uma-kain hamutuk 185, ho populasaun besik ema 1.700. Sistema ne’e mós fornese bee ba instituisaun públika sira hanean Postu Saúde Kaikasa Bu’u no EBF Kaikasa Bu’u.
Kontestu
Problema asesu ba bee-moos iha Suku Babulu mosu depoizde ekipa EDTL tesi liña eletrisidade ne’ebé fornese enerjia ba bomba distribuisaun bee, tanba liña referida seidauk rejistadu iha EDTL.
Iha 14 Outubru 2026, TATOLI relata katak komunidade Suku Babulu lamenta desizaun EDTL atu tesi liña eletrisidade ne’e, tanba interupsaun ne’e afeta ba uma-kain 185 atu asesu bee-moos, ho populasaun besik ema 1.700, inklui eskola no postu saúde. EDTL esplika katak ligasaun eletrisidade ne’e seidauk rejistada, no atu liga fali, utilizadór sira tenke kumpre uluk prosesu rejistasaun.
Lee notísia relevante: Abitante Babulu lamenta EDTL tesi liña eletrisidade ne’ebé fornese enerjia ba bomba bee – TATOLI, 14 Outubru 2026.
Iha 19 Outubru 2026, TATOLI mós relata katak Postu Saúde Kaikasa Bu’u enfrenta falta bee-moos durante kuaze semana rua. Situasaun ne’e obriga pesoál saúde sira kuru bee fali iha fatin ne’ebé distánsia besik metru 700 hosi postu saúde, hodi kontinua fó atendimentu ba pasiente sira. Responsável Postu Saúde, Médika Agripina Freitas, esplika katak bee-moos importante tebes atu fase liman, hamoos kanek pasiente sira-nian no mantein ijiene iha sentru saúde.
Lee mós: Semana rua ona Postu Saúde Kaikasa Bu’u enfrenta falta bee-moos – TATOLI, 19 Outubru 2026.
Ho instalasaun hikas kontadór eletrisidade, komunidade Babulu agora asesu fali ona bee-moos. Maski nune’e, mekanizmu kontribuisaun no sosa pulsa eletrisidade sei presiza desizaun hamutuk hodi garante sistema distribuisaun bee ne’e bele funsiona ho kontinuidade.
Jornalista: Vitorino Lopes da Costa
Editór: Xisto Freitas da Piedade
