DILI, 18 agostu 2020 (TATOLI)-Kooperasaun Governu Timor-Leste ho Banku Dezenvolvimentu Aziátiku (ADB, sigla inglés) no Programa Nasaun Unidada ba Dezenvolvimentu (PNUD), iha kuarta (19/08), sei oferese tán bote ai-han ba família vulnerável iha Metinaro.
Ema na’in-163 ne’ebé kompostu husi ema ho difisiénsia, órfaun, ferik-katuas no faluk iha Suku Wenunue, Postu Administrativu Metinaro, Munisípiu Dili mak sei simu bote ai-han, ne’ebé mai diretamente husi agrikultór lokál sira liuhosi apoia Governu nian iha sindikatu loja agrikultór sira.
“Projetu ne’e sei ajuda atu evita atrazu infánsia no fó garantia seguransa ai-han ba labarik sira iha Timor-Leste husi família vulnerável liu no hasa’e sistema imunolójiku, no mós fó impulsu ekonómiku ba produtor lokál, empresa agríkola mikro no ki’ik atu rekupera husi impaktu COVID-19,” tenik Xefe Seniór ADB, José Pereira, liuhosi nota impresa ne’ebé Agência Tatoli asesu, tersa ne’e.
Notísia Relevante: ADB-PNUD distribui bote ai-han ba família vulnerável iha Baucau
Hafoin sirkulasaun prinsipál ekonomia nian, projetu ne’e hakarak atu multiplika estímulu impaktu ekonómiku liuhosi asesu ba komponente nesesáriu hotu iha rai-laran.
Bote ai-han ne’e rasik atu apoiu rendimentu ba agrikultór sira iha Timor-Leste laran tomak no utiliza porsentu 100 materiál renovável husi agrikultór rai-laran.
Nune’e, projetu ne’e sei tulun Governu to’o ba uma-kain 25.000 ne’ebé konsidera vulnerável liu iha Munisípiu Dili, Baucau, Bobonaro, Covalima no Rejiaun Administrativu Espesiál Ambeno no Oé-Cusse (RAEOA).
Inisiativa ne’e reprezenta kooperasaun ne’ebé metin liu no relasaun foun entre Governu Timor-Leste ho parseiru dezenvolvimentu sira.
Kada bote iha foos kilograma 15, batar ikis kilograma lima, fore oin-oin kilograma lima, modo tipu haat ne’ebé dura ba tempu naruk, ai-fuan no masin.
“Foos, batar ikis, koto, maihosi Loja Agrikultura ne’ebé administra liu agrikultor lokál hamutuk 100 no ai-fuan sira inklui modo sira, mai diretamente husi agrikultór lokál sira,” nota ne’e esplika.
Projetu ne’e finansia husi Governu Japaun liuhosi sob-fundu resposta ba dezastre naturál iha Ázia Pasífiku hosi ADB ho montante millaun $1 no husi PNUD ho montante $105.000.
Jornalista: Florêncio Miranda Ximenes
Editora: Julia Chatarina
