DILI, 23 juñu 2021 (TATOLI)—Tribunál Distritál Dili (TDD), liuhosi prosesu sumáriu ne’ebé prezide hosi juiza Ercilia da Silva, aplika multa $60 ba arguidu SM, tanba kondúz motorizada laiha karta kondusaun.
Tuir faktu katak, iha 19 juñu tuku 11:45 otl iha área Bairu Pité, aguidu kondúz motorizada beat metan, la uza kapasete hodi kontra mós sinais tránzitu.
Notísia relevante:Aban, TDD hahú atende julgamentu normál
Momentu ne’e kedan arguidu hetan detensaun hosi polísia tránzitu, hodi kumpre sela detensaun polísia durante oras 72.
Tribunál konsidera katak, arguidu nia hahalok prienxe duni rekezitu no elementu substantive-sira, ba krime sem karta kondusaun ne’ebé previstu iha artidu 207 hosi lei 6/2013 no artigu 115 hosi lei kódigu penál.
Tanba ne’e, Tribunál singulár haree hosi krime ne’e nia kastigu loron 30 to’o tinan rua ka bele multa.
Nune’e, Tribunál aplika multa ba arguidu ho kustu taxa diária, kada loron arguidu tenke selu $1 to’o loron 60, no bainhira arguidu la kumpre, sei hetan kastigu iha prizaun durante loron 40.
Iha audiénsia ne’e, Ministériu Públiku (MP) reprezenta hosi prokuradór na’in-ida, no arguidu hetan asisténsia legál hosi defensór públiku.
Jornalista: Nelson de Sousa
Editór: Cipriano Colo
