DILI, 25 juñu 2021 (TATOLI)-Ministru Edukasaun, Juventude no Desportu (MEJD), Armindo Maia, relata progresu servisu ba Primeiru-Ministru (PM), Taur Matan Ruak.
“Mai relata ba Primeiru-Ministru kona-ba atividade ministériu nian, liuliu iha área infraestrutura no rekrutamentu,” Ministru relata hafoin hasoru Xefe Governu, iha Rezidénsia Farol, sesta ne’e.
Kona-ba projetu infraestrutura ne’ebé MEJD sei implementa iha 2021 la’o kleur tanba ho situasaun atuál COVID-19 no prosesu sira seluk.
Nune’e, bazeia orsamentu 2021 MEJD, sei harii sala aula 800 iha territóriu tomak, biblioteka, laboratóriu, no sala ba profesór sira.
“Ha’u informa kona-ba prosesu infraestrutura ninian, la’o kleur oituan tanba prosesu tenke liuhosi Ajénsia Dezenvolvimentu Nasionál (ADN) no Ministériu Obra Públika (MOP), maibé Primeiru-Ministru husu ba ha’u atu dudu prosesu ne’e lalais, maski la to’o 100% maibé bele to’o netik 50-70%,” nia akresenta.
Aleinde ne’e, Ministru informa mós kona-ba rekrutamentu ba profesór sira.
Notísia relevante: MEJD sei rekruta tan profesór na’in-975
“Ba sira kontratadu hamutuk 5.000 resin sei iha prosesu diskusaun inklui voluntáriu 1.000 resin, vaga hamutuk 975 maibé rekrutamentu iha faze diskusaun,” nia hatutan.
Durante sorumutuk, parte rua diskute kona-ba preparasaun orsamentu tinan 2022 ba MEJD, ne’ebé Governu fixa ona ninia kalendáriu.
Jornalista : Antónia Gusmão
Editora : Julia Chatarina
