DILI, 08 jullu 2021 (TATOLI)—Governu Australianu oferese tan vasina COVID-19 ho tipu AstraZeneca hamutuk doze 45.000, ba Timor-Leste (TL).
“Governu Austrália fó tan AstraZeneca doze 45.000 ne’ebé to’o ohin. Tuir dokumentu ne’ebé ami simu, atu responde ba doze daruak ne’ebé antes ne’e ita fó ona ba munisípiu Dili,’’ Diretór Ezekutivu Serbisu Autónomu Medikamentu no Ekipamentu Saúde (SAMES), Santana Martins, hateten ba jornalista Agência Tatoli iha edifísiu SAMES Kampung Alor, kinta ne’e.
Notísia relevante:Aban TL simu tan AstraZeneca doze rihun 65 hosi Austrália
AstraZeneca doze hirak-ne’e transporta ona mai Timor-Leste ho aviaun Air North, iha tuku 12:30, ne’ebé transporta kedan mai armazén sentrál SAMES.
Tuir planu, Ministériu Saúde sei utiliza AstraZeneca doze 45.000 ne’e hodi responde ba doze daruak iha munisípiu Dili ne’ebé aban sei halo lansamentu iha postu administrativu Metinaro.
To’o ohin loron, Governu Australianu oferese ona vasina AstraZeneca ba Governu Timor-Leste hamutuk doze 180.000.
Jornalista: Felicidade Ximenes
Editór: Cipriano Colo
