DILI, (TATOLI) – Polísia Nasionál Timor-Leste (PNTL), liuhosi Segundu Komandante, Faustino da Costa, informa ba adidu seguransa no defesa ba embaixada sira iha Timor-Leste kona-ba situasaun jerál no oinsá preparasaun seguransa nian iha festa demokrásia.
“Bele ka la’e iha momentu prosesu kampaña eleitorál to’o eleisaun ami bele halo atividade ruma, ita dehan ba sira katak la’ós tan kampaña mak atividade hotu paradu maibé programa saida de’it mak iha tenke la’o nafatin”, haktuir Faustino hafoin hasoru malu ho adidu seguransa no defeza hosi embaixada hotu iha Kuartel Jerál PNTL, Kaikoli, ohin.
Embaixada hotu ne’ebé eziste iha Timor-Leste liliu adidu defeza no seguransa hanesan Embaixada Estadu Unidu Amerika (EUA), Austrália, Xina, Filipina, Portugal, Brazil no seluk tan.
Adidu defeza no seguransa hosi nasaun hotu informadu ona kona-ba situasaun jerál no prosesu preparasaun hodi asegura kampaña no eleisaun antesipada parlamentár.
“Sira husu informasaun ba Polísia Nasionál Timor-Leste (PNTL) katak bele ka la’e ami hala’o programa mezmu iha momentu kampaña”, haktuir tan Faustino da Costa.
Enkuantu, PNTL asegura másimu iha kampaña eleitorál no to’o eleisaun hotu mezmu orsamentu duodésimu ladun sufisiente ba operasionalizasaun servisu iha teritóriu nasionál mas garante nafatin hodi fó seguransa ne’ebé di’ak iha àmbitu kampaña eleitorál to’o finál.
Entretantu, abertura kampaña eleitorál ohin 10 abril to’o 9 maiu no eleisaun 12 maiu maibé sempre hetan seguransa ne’ebé di’ak, atu nune’e bele iha estabilidade iha prosesu festa demokrásia.
Jornalista: Zezito Silva
Editora: Rita Almeida
