DILI, 19 janeiru 2022 (TATOLI)— Diretora Jerál Prestasaun Saúde Odete da Silva Viegas informa, profisionál saúde fó alta ba pasiente dengue na’in-204 tanba rekuperadu ona hosi surtu ne’e iha Sentru Internamentu Vera-Cruz.
“Sentru ne’e hahú funsiona iha loron 5 janeiru 2022, ita konsege fó baixa ba pasiente na’in-300-resin, maibé to’o horiseik ita fó alta ona pasiente na’in-204 ne’ebé rekuperadu ona. Enkuantu sei baixa hela hamutuk 106,” Diretora Jerál Prestasaun Saúde Odete da Silva Viega, hateten ba jornalista sira iha sentru internamentu vera kruz ohin.
Profisionál saúde mós konsege salva pasiente dengue liuliu labarik ne’ebé kondisaun kritíku. Tanba moras dengue ne’e mai ho faze tolu, hanesan isin manas, raan sai hosi inus no muta no kondisaun grave to’o lakon vida.
Kazu dengue númeru sa’e ne’e, Diretora Jerál ne’e dehan la’ós MS nia servisu de’it, maibé kolabora mós ba entidade hotu hamutuk halo asaun medida preventiva liuhosi kolaborasaun ho Prezidente Autoridade Munisípiu, Xefe Suku, Xefe Aldeia sira atu halo sensibilizsaun ba komunidade atu halo limpeza no presiza mós asaun fahe aimoruk abate no fomigasaun ka rega susuk.
Nune’e, nia husu ba inan -aman sira bainhira labarik isin manas presiza alerta fó aimoruk ka lori kedas mai iha fasilidade saúde ne’ebé besik atubele hetan atendimentu, molok tarde tama ba iha situasaun grave.
“Ami tékniku sira- nia hanoin katak bainhira Sentru Internamentu Vera-Cruz mak nakonu ka laiha tan espasu ita sei uza tan fatin iha Tasi-Tolu sai hanesan alternativu ida atu halo prevensaun ba moras dengue,alende fatin ami mós tenke prepara rekursu umanu,” nia akresenta.
MS mós ko’alia ona ho Kruz Vermella Timor-Leste atu apoia médiku no Enfermeira, maibé karik kazu ne’e barak nafatin sei reforsa médiku hosi munisípiu sira tanba no provavelmente iha fulan fevereiru no marsu dengue ia númeru sei aumenta makas.
Nune’e mós Organizasaun Mundiál Saúde fó ona apoiu dengue teste kit, aimoruk kímiku abate no fomigasaun ba Minsiteriu Saúde atu halo atuasaun ba kazu dengue ne’ebé mak aas iha munsípiu Dili.
Númeru dengue sa’e 593 no óbitu na’in-10
Ministériu Saúde liuhosi Diresaun Nasionál Saúde Públika liuliu Departamentu Visilansia Epidemolojia relata, pasiente dengue iha meadu janeiru tinan 2022 sa’e ba na’in-593, hosi númeru ne’e mate na’in-10
Kazu obito na’in-10 ne’e relata iha munisípiu Dili na’in-rua, Ermera na’in-haat, na’in-ida hosi Ainaro, na’in-ida hosi Bobonaro no na’in-rua hosi Covalima.
Maioria kazu ne’e deteta husi Munisípiu Dili ho totál 412, munisípiu Baucau 32 kazu, Manatuto ho kazu 32, Covalima ho kazu 24, Ermera ho kazu 55, Manufahi ho kazu 19, Viqueque kazu haat, Ainaro ho kazu haat, Liquiça kazu tolu, Aileu kazu ida no Bobonaro iha kazu hitu.
Kuidadu oan hosi dengue
Entretantu, Espoza Prezidente Repúblika, Cidália Nobre Lopez Mouzinho Guterres, husu ba inan-aman sira atu kuidadu ona-sira iha tempu udan no prepara hahan ne’ebé mak saudavel atu hasa’e imunidade labarik sira nian hodi kontra moras hotu inklui dengue.
“Kuidadu ita-nia oan sira iha uma kuidadu sira nia hahan atu nune’e sira konsumu ho di’ak, hamoos uma laran no areadór hodi hadook aan labarik sira hosi moras dengue,” Espoza PR sujere.
Espoza PR mós kongratulla no agradese ba profisionál saúde sira ho esforsu tomak halo atendementu ba labarik sira ne’ebé afeta surtu dengue ne’e, nune’e husu ba Ministériu saúde atu tau atensaun másimu ba fasilidade saúde sira hodi fasilita pesoál saúde sira atende pasiente sira.
“Ha’u husu ba inan-aman sira tenke iha komunikasaun di’ak ho médiku sira atu oinsá iha situasaun ida ne’e bele hamutuk tau matan ba labarik sira hodi bele rekupera lalais,” nia ekoraja.
Notísia relevante:Pasiente dengue aumenta ba 521, óbitu nain-sia
Jornalista : Felicidade Ximenes
Editór : Florencio Miranda Ximenes
