DILI, 03 fevereiru 2022 (TATOLI)- Tribunál Rekursu (TR) haruka fila dokumentu kandidatu Prezidente Repúblika Independente 2022-2027, Luis Tilman tanba seidauk prenxe rekezitu balun.
“Ami lori dokumentu kandidatu Luis Tilman atu mai rejistu iha Tribunál Rekursu, maibé la konsege tanba presiza dokumentu balun hanesan eletrónika,” Portavóz ekipa susesu, Mario da Silva hateten ba Jornalista sira iha Tribunál Rekursu, kinta ne’e.
Notísia relevante: Kandidatu PR Lú-Olo rejista ona iha Tribunál Rekursu
Kandidatu Independente ne’ebé hetan apoiante ka proponente hamutuk 5.000-resin, sei fila ba kompleta dokumentu, hafoin mai rejista fali iha lokoraik ne’e.
“Ami ba halo kompletu, atu lokoraik ami sei submete hikas dokumentu hodi rejista ami nian kandidatura,” portavóz ne’e akresenta.
Tuir nia, razaun Luis Tilman kandidatu-an hodi kompete iha Eleisaun Prezidensiál tinan ne’e tanba nuudar sidadaun ho hakarak rasik partisipa iha eventu demokrátiku ne’e.
“Atu desizaun hili ka la hili ne’e desizaun iha povu nian liman,” dehan Portavoz ekipa susesu ne’e.
Notísia relevante: Kandidatu Lere rejista ofisialmente iha Tribunál Rekursu
Jornalista: Natalino Costa
Editór : Florencio Miranda Ximenes
